الماتىدا قاڭتار وقيعاسىنا قاتىسقان ازاماتتى ازاپتاعان پوليتسيا قىزمەتكەرلەرىنە سوت ۇكىمى شىقتى
سوت وتكەن جىلدىڭ قاڭتار ايىنداعى جاپپاي تارتىپسىزدىكتەر كەزىندە اۆتوكولىكتى زاڭسىز يەمدەندى دەگەن كۇدىككە ىلىنگەن ازامات ر- نىڭ پوليتسيا بولىمشەسىنە جەتكىزىلگەنىن انىقتادى.
پوليتسيا قىزمەتكەرى ق. ودان ءارى تەرگەپ-تەكسەرۋ ءۇشىن ازامات ر- نى پوليتسيا قىزمەتكەرلەرى ب. جانە ح- عا تاپسىرعان. ول ەكەۋى ازامات ر- نى تارتىپسىزدىكتەرگە قاتىستى دەپ ەسەپتەپ، زارداپ شەككەن ارىپتەستەرى ءۇشىن كەك الامىز دەگەن ماقساتپەن وعان فيزيكالىق قىسىم كورسەتىپ، كۇش قولدانىپ، ازاپتاعان.
سوتتا حابارلاعانداي، اتالمىش ارەكەتتەر ءۇشىن قىلمىستىق كودەكستە بەلگىلى ءبىر لاۋازىمداردى اتقارۋ قۇقىعىنان ايىرا وتىرىپ، 3 جىلدان 7 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراستىرىلعان.
سونداي-اق ءۇش پوليتسيا قىزمەتكەرى قىلمىستىق قۇقىقبۇزۋشىلىق جاساعانىن باسشىلىقتان جاسىرعان.
قىلمىستىق كودەكستە قۇقىق قورعاۋ ورگانىنىڭ قىزمەتكەرى بولا وتىرىپ، قىزمەتتە ارەكەتسىزدىك جاساعانى ءۇشىن ءۇش جىلعا دەيىن باس بوستاندىعىنان ايىرۋ جازاسى كوزدەلگەن.
سوت سوتتالۋشى ق- عا جازا تاعايىنداۋ كەزىندە مۇلىكتىك زالالدى جانە مورالدىق زياندى ەرىكتى تۇردە وتەۋىن جازانى جەڭىلدەتەتىن ءمان-جايلار دەپ تانىدى. ال توتەنشە جاعدايدا قىلمىستىق قۇقىقبۇزۋشىلىق جاساۋىن جانە ونىڭ بەرگەن انتىن بۇزۋىن جازانى اۋىرلاتاتىن ءمان-جايلار رەتىندە تانىدى.
سوتتالۋشى ب- عا جازا تاعايىنداۋ كەزىندە جاس بالالارىنىڭ بولۋىن، مۇلىكتىك زالال مەن مورالدىق زياندى وتەۋىن جازانى جەڭىلدەتەتىن ءمان-جايلار رەتىندە قاراستىرسا، توتەنشە جاعدايدا قىلمىستىق قۇقىقبۇزۋشىلىق جاساعانى جانە ونىڭ بەرگەن انتىن بۇزعان ارەكەتتەرىن جازانى اۋىرلاتاتىن ءمان-جايلار رەتىندە ەسكەردى.
سوتتالۋشى ح- عا جازا تاعايىنداۋ كەزىندە توتەنشە جاعدايدا قىلمىستىق قۇقىقبۇزۋشىلىق جاساعانى جانە انتىن بۇزعان ارەكەتتەرىن جازانى اۋىرلاتاتىن ءمان-جايلار رەتىندە تانىدى.
«سوت ۇكىمىمەن سوتتالۋشىلار ب. جانە ح. قىلمىستىق كودەكستىڭ 1-تارماعىنىڭ 146-بابى 2-بولىگى بويىنشا كىنالى دەپ تانىلىپ، ءۇش جىل مەرزىمگە مەملەكەتتىك قىزمەتتە قىزمەت اتقارۋ قۇقىعى شەكتەلە وتىرىپ، ءۇش جىل مەرزىمگە باس بوستاندىعىنان ايىرۋ جازاسى تاعايىندالدى. سوتتالۋشى ق. ق ك- ءنىڭ 370-بابىنىڭ 2-1-بولىگى بويىنشا كىنالى دەپ تانىلىپ، مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرىلدى. سونداي-اق، وعان 1 جىل 6 اي مەرزىمگە باس بوستاندىعىن شەكتەۋ تۇرىندەگى جازا تاعايىندالدى. ۇكىم زاڭدى كۇشىنە ەنگەن جوق»، - دەپ حابارلادى الماتى قالالىق سوتىنىڭ باسپا ءسوز قىزمەتىندە.
