نازاربايەۆ كىتاپحاناسى ديرەكتورىنىڭ ورىنباسارى قاماۋعا الىندى

None
استانا. قازاقپارات - ءبىرقاتار اقپارات قۇرالدارى ەكس-پرەزيدەنت نازاربايەۆتىڭ كومانداسىنا كىرەتىن، تۇڭعىش پرەزيدەنت كىتاپحاناسى ديرەكتورىنىڭ ورىنباسارى تيمۋر شايمەرگەنوۆتىڭ ۇستالعانى تۋرالى جازدى، دەپ حابارلايدى قازتاگ.

اگەنتتىكتىڭ اقپاراتى بويىنشا نازاربايەۆ كىتاپحاناسىنىڭ ورىنباسارى وتكەن جىلعى جەلتوقسان ايىنىڭ ورتاسىندا قاماۋعا الىنعان. شايمەرگەنوۆتىڭ ۇستالعانىن پورتالعا استاناداعى سەنىمدى دەرەككوز حابارلاعان.

دەرەككوزدىڭ ءمالىم ەتكەنىندەي كىتاپحانا قىزمەتكەرىن ارنايى قىزمەت وكىلدەرى ەلوردادا قۇرىقتاعان. ونىمەن بىرگە ايەلى دە قاماۋعا الىنعان. شايمەرگەنوۆتىڭ جۇبايى سىرت ەلدەردىڭ ءبىرىن زەرتتەۋمەن اينالىساتىن ينستيتۋتقا باسشىلىق ەتكەن، - دەپ جازادى قازتاگ.

رەسمي ورگاندار مەن كىتاپحانا تاراپىنان بۇعان قاتىستى قانداي دا ءبىر تۇسىنىكتەمە بەرىلمەدى.

شايمەرگەنوۆ بۇعان دەيىن نازاربايەۆ باسشىلىق ەتكەن قاۋىپسىزدىك كەڭەسىندە ىستەگەن، اەروعارىش جانە قورعانىس ونەركاسىبى ۆيتسە-ءمينيسترى قىزمەتىن اتقارعان. سىرتقى ىستەر مينيسترلىگىندە حالىقارالىق اقپارات كوميتەتىنە جەتەكشىلىك ەتكەن.

سوڭعى جىلدارى نازاربايەۆ كىتاپحاناسىنىڭ باسشىلىق قۇرامىندا بولدى. ورتا ازيا مەن قىتايدى جەتىك بىلەتىن مامان دەپ سانالادى.

اقپارات وكىلدەرى وقيعانىڭ انىق-قانىعىن ءبىلۋ ماقساتىندا كىتاپحاناعا حابارلاسقانمەن ونداعىلار جاۋاپ بەرۋدەن باس تارتقان.

نۇرسۇلتان نازاربايەۆ الەمدىك كوشباسشى-رەفورماتورلارمەن ءبىر قاتاردا تۇر، - دەگەن بولاتىن بيلىك باسىلىمدارىنا سۇحبات بەرگەن شايمەرگەنوۆ.

ونىڭ پايىمداۋىنشا قازاقستاندى قارىشتاپ دامۋ جولىنا سالعان «نازاربايەۆ مودەلىنەن» باس تارتپاۋ قاجەت. تۇڭعىش پرەزيدەنت شەتەلدىك، ەۋروپالىق نەمەسە امەريكالىق دامۋ مودەلىن كوشىرە سالماعان.

الەمدىك تاجىريبەدەگى امبەباپ قاعيداتتاردى ىرىكتەي وتىرىپ، ول جولداردى ۇلتتىق كونتەكستكە شەبەر ەنگىزە بىلگەن. جاڭعىرتۋدىڭ ساتتىلىگى تۇڭعىش پرەزيدەنتتىڭ مەملەكەتتىك باسقارۋداعى مودەلىنە تىكەلەي بايلانىستى…

سولاي دەگەن شايمەرگەنوۆ قاڭتار قىرعىنىنان كەيىن ءبىرجولاتا بيلىكتەن كەتكەن ەكس-پرەزيدەنتتى اتاتۇرىك، شارل دە گولل، فرانكلين رۋزۆەلت، م. موحاماد، مارگارەت تەتچەر، لي كۋان يۋ سەكىلدى ايگىلى قايراتكەرلەردىڭ قاتارىنا قوسقان ەدى.


سوڭعى جاڭالىقتار