ءاليحان سمايىلوۆ: جاڭا تۇجىرىمداما اۋىل ەكونوميكاسىنىڭ الەۋەتىن كەڭەيتۋگە مۇمكىندىك بەرەدى

استانا. قازاقپارات – ق ر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن كەڭەستە سالالىق تۇجىرىمدامالاردىڭ جوبالارى مەن استانا ماڭىنداعى ەلدى مەكەندەردى الەۋمەتتىك-ەكونوميكالىق دامىتۋدىڭ كەشەندى جوسپارى قارالدى.

بۇل تۋرالى قازاقپارات ۇكىمەتتىڭ رەسمي سايتىنا سىلتەمە جاساپ حابارلايدى.

ۇلتتىق ەكونوميكا ءمينيسترى الىبەك قۋانتىروۆ استانا ماڭىنداعى ەلدى مەكەندەردى الەۋمەتتىك-ەكونوميكالىق دامىتۋدىڭ كەشەندى جوسپارىندا 2025-جىلعا دەيىن مەكتەپتەر، بالاباقشالار، اۆتوجولدار، گاز، جىلۋ، ەلەكترمەن، سۋمەن جابدىقتاۋ جانە سۋ بۇرۋ جەلىلەرىن سالۋ، ونەركاسىپتى دامىتۋ، سونداي-اق ازاماتتاردى سپورتپەن جانە مەديتسينالىق قىزمەتتەرمەن قامتۋدى ارتتىرۋ جانە ت. ب. كوزدەلگەنىن حابارلادى.

پرەمەر-مينيستر ۇسىنىلعان كەشەندى جوسپاردىڭ جوباسىن رەسپۋبليكالىق بيۋجەت كوميسسياسى ماقۇلداعانىن ەسكەرە وتىرىپ، ونى قولدايتىنىن ايتتى.

سونداي-اق كەڭەستە ۇلتتىق ەكونوميكا ءمينيسترى قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027-جىلدارعا ارنالعان تۇجىرىمداماسىنىڭ جوباسىمەن تانىستىردى.

ونىڭ ايتۋىنشا، اۋىلدىق اۋماقتاردا الەۋمەتتىك جانە ينجەنەرلىك ينفراقۇرىلىمدى (مەكتەپتەر، اۋرۋحانالار، ينتەرنەت، سۋ قويمالارى جانە ت. ب.) جاڭعىرتۋ، كاسىپكەرلىك ارقىلى اۋىل تۇرعىندارىنىڭ تابىسىن ارتتىرۋ، جەكە قوسالقى شارۋاشىلىقتار مەن كووپەراتسيالاردى دامىتۋ جانە ت. ب. شارالار ىسكە اسىرىلادى.

تۇجىرىمداما اۋىلدىق اۋماقتاردى دامىتۋ تاسىلدەرىنىڭ تيىمدىلىگىن ارتتىرۋ، ءومىر ءسۇرۋ ساپاسىن جاقسارتۋ جانە اۋىلدىق جەرلەردە جايلى ءومىر سۇرۋگە قولايلى ورتا قۇرۋ ءۇشىن مەملەكەت باسشىسىنىڭ ءتيىستى جارلىعى مەن سايلاۋالدى باعدارلاماسىن ىسكە اسىرۋ ءۇشىن ازىرلەنەدى.

سونداي-اق كەڭەستە رەسپۋبليكانىڭ وتىن-ەنەرگەتيكا كەشەنىن 2026-جىلعا دەيىن جانە ەلەكتر ەنەرگەتيكاسى سالاسىن 2032-جىلعا دەيىن دامىتۋ تۇجىرىمدامالارىنىڭ جوبالارى قارالدى.

پرەمەر-مينيستر ۇسىنىستار مەن ەسكەرتۋلەردى ەسكەرە وتىرىپ، ولاردى پىسىقتاۋدى تاپسىردى.