اۋىلدار مەن شاعىن قالالاردىڭ تۇرعىندارى بيزنەس ءۇشىن جەڭىلدىكپەن شاعىن نەسيە الا الادى – اۋىل شارۋاشىلىعى مينيسترلىگى
بۇل مەملەكەت باسشىسىنىڭ تاپسىرماسى اياسىندا اۋىل حالقىنىڭ تابىسىن ارتتىرۋ جونىندەگى جوبانى كەڭەيتۋدىڭ ارقاسىندا مۇمكىن بولادى. 2019-جىلى ول جامبىل وبلىسىندا پيلوتتىق رەجيمدە ءساتتى ىسكە اسىرىلدى، دەپ حابارلايدى قازاقپارات ق ر اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ.
باسپا ءسوز قىزمەتىنىڭ مالىمەتتەرىنە قاراعاندا، بۇگىن اقتوبە وبلىسىنىڭ تۇرعىندارىنا جوبانىڭ شارتتارى مەن ەرەجەلەرى تۋرالى اۋىل شارۋاشىلىعى ءمينيسترى ەربول قاراشوكەيەۆ پەن AMANAT پارتياسىنىڭ ءتوراعاسى ەرلان قوشانوۆ وڭىرگە جۇمىس ساپارى كەزىندە ايتىپ بەردى.
وسى جوبا بويىنشا شاعىن نەسيە بەرۋ مەرزىمى - 5 جىل، بۇل رەتتە مال شارۋاشىلىعى سالاسىنداعى باستامالار ءۇشىن 7 جىل كوزدەلگەن. ماكسيمالدى سوما - 2,5 مىڭنان 8 مىڭعا دەيىن (زاكىرلىك كووپەراتسيا) ا ە ك، نومينالدى سىياقى مولشەرلەمەسى جىلدىق %2,5 دان اسپايدى.
قاراجاتتى ءىسىن جاڭا باستاعان جانە بۇرىننان جۇمىس ىستەپ جۇرگەن كاسىپكەرلەر؛ زەينەت جاسىنا تولماعان قىسقارتىلاتىن جۇمىسكەرلەر؛ ج ك رەتىندە تىركەلمەگەن تاۋارلاردى ءوندىرۋ نەمەسە ساتۋ، جۇمىستاردى ورىنداۋ جانە قىزمەت كورسەتۋدى دەربەس جۇزەگە اسىراتىن تۇلعالار (ونىڭ ىشىندە ارەكەتسىز ج ك)؛ وتباسىلىق كاسىپكەرلىكتە اقى تولەنبەيتىن قىزمەتتى جۇزەگە اسىراتىن تۇلعالار؛ جەكە قوسالقى شارۋاشىلىقتا كۇنكورىس دەڭگەيىنەن تومەن تابىس الىپ، ساتۋ نەمەسە ايىرباستاۋ ءۇشىن ءونىم وندىرەتىن تۇلعالار الا الادى.
جوبانى ىسكە اسىرۋعا 2023-جىلى رەسپۋبليكالىق بيۋدجەتتەن 52,4 ميلليارد تەڭگە (11 مىڭنان استام شاعىن نەسيە) كوزدەلگەن. بۇل رەتتە اكىمدىكتەر قازىرگى ۋاقىتتا قوسىمشا قانشا قاراجات قاجەت ەكەنىن انىقتاۋ ءۇشىن اۋىلدىق وكرۋگتەرگە سكرينينگ جۇرگىزىپ جاتىر.
