د د س ۇ قىتايدان كوروناۆيرۋستىڭ جاڭا تولقىنى تۋرالى مالىمەتتى جاسىرماۋعا شاقىردى

مۇنداي مالىمدەمە كوروناۆيرۋستان قايتىس بولعانداردىڭ رەسمي سانى انىقتالعاننان كەيىن جاسالدى. وسى مالىمەتتەرگە سايكەس، جەلتوقسان ايىنان بەرى COVID-19 دان تۋىنداعان تىنىس الۋداعى پروبلەمالاردان 5,5 مىڭنان استام ادام اجال قۇشتى. تاعى 55 مىڭعا جۋىق ادام اتالعان ينفەكسيا قوزدىرعان ءتۇرلى سىرقاتتاردان كوز جۇمدى، دەپ حابارلايدى قازاقپارات Euronews اگەنتتىگىنە سىلتەمە جاساپ.

بۇل رەتتە قىتاي ەپيدەميانىڭ كەزەكتى شارىقتاۋ شەگى ارتتا قالعانىن، جاڭادان تىركەلگەن ناۋقاستار سانى جەلتوقسان سوڭىنداعى كورسەتكىشپەن سالىستىرعاندا %83 ازايعانىن ايتىپ وتىر.

قىتاي بيلىگى سانيتاريا تالاپتارىن تاعى دا جەڭىلدەتكەنىن حابارلادى. گونكونگقا جۇردەك پويىزدىڭ قوزعالىسى قالپىنا كەلتىرىلدى. حالىقتىڭ جاپپاي نارازىلىعىنا بايلانىستى ەل ۇكىمەتى COVID-19 عا «نولدىك توزىمدىلىك» ساياساتى اياسىنداعى وزگە ءبىرقاتار شەكتەۋدەن باس تارتقان بولاتىن. وسىدان كەيىن ۆيرۋس جۇقتىرعاندار قايتا كوبەيىپ، قىتايعا كەلەتىندەرگە جاڭا حالىقارالىق شەكتەۋلەر ەنگىزىلدى.

بۇعان دەيىن قىتاي كوروناۆيرۋستان ءبىر ايدا 60 مىڭعا جۋىق ادام مەرت بولعانىن حابارلاعان ەدى.