استانا قۇتقارۋشىلارى شاتىردان سىرعىپ تۇسەتىن قار مەن مۇز سۇڭگىلەرىنەن اباي بولۋعا شاقىردى

استانا. قازاقپارات - استانا قالاسىنىڭ توتەنشە جاعدايلار دەپارتامەنتى قالىڭ قار جاۋۋىنا بايلانىستى عيمارات شاتىرلارىنان قار جانە مۇز قۇلاۋ قاۋپى بارىن ەسكەرتەدى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.

سول سەبەپتى ساق بولىپ، مۇمكىندىگىنشە عيماراتقا جاقىن جۇرمەۋ قاجەت.

عيماراتتان شىققان كەزدە قۇلاۋى مۇمكىن جەرلەردى اينالىپ ءوتۋ كەرەك. بالالاردىڭ قاۋىپسىزدىگىنە دە ەرەكشە نازار اۋدارعان ابزال.

ەگەر ءسىز جاياۋ جۇرگىنشىلەر جولىندا كەلە جاتىپ، كەلەڭسىز دىبىس ەستىگەن بولساڭىز، جوعارى قاراپ تۇرماي، تەز ارادا ءقاۋىپسىز تۇسقا جۇگىرۋىڭىز كەرەك.

مۇمكىندىگىنشە عيماراتتار مەن قۇرىلىستاردىڭ جانىنا كولىك قويماعان ءجون، وندا مۇزدار مەن قاردىڭ قۇلاۋ ءقاۋپى بار.

عيماراتتاردىڭ شاتىرىن قاردان تازالاعان كەزدە مىندەتتى تۇردە قاۋىپسىزدىك تالاپتارىنا سايكەس ۇيىمداستىرىلۋى ءتيىس، سول سياقتى جۇمىس جۇرگىزىلىپ جاتقان جەرلەردە جۇرۋگە تىيىم سالىناتىن بەلگىلەر قويىپ، قورشالۋى قاجەت.