ءىرى بانكتەردىڭ ماركەتينگ اكسيالارى تۇتىنۋشىلىق كرەديتتەردىڭ وسۋىنە ىقپال ەتتى
بۇل تۋرالى ق ر ۇلتتىق بانكىنىڭ ءتوراعاسى عالىمجان ءپىرماتوۆ ءمالىم ەتتى، دەپ حابارلايدى قازاقپارات ءتىلشىسى.
«ەكونوميكانىڭ ءوسۋ تراەكتورياسى بازالىق سەناريگە سايكەس قالىپتاسۋدا. ۇلتتىق ستاتيستيكا بيۋروسىنىڭ الدىن الا باعالاۋىنا سايكەس، 2022-جىلدىڭ قورىتىندىسى بويىنشا جالپى ىشكى ءونىم 3,1 پايىزعا ارتتى. ىسكەرلىك بەلسەندىلىكتىڭ وسۋىنە نەگىزىنەن ەلدىڭ تاۋار وندىرىسىندەگى وڭ ديناميكا سەبەپ بولدى. ەڭ كوپ ءوسۋدى قۇرىلىس سالاسى كورسەتتى - 9,4 پايىز جانە رەكوردتىق استىق جيناۋ اياسىندا اۋىل شارۋاشىلىعى - 9,1 پايىز. قىزمەت سەكتورى بويىنشا ساۋدا، كولىك جانە بايلانىس سالالارىندا ءوسۋ بايقالدى. وسىعان بايلانىستى 2022-جىلى جالپى ىشكى ءونىمنىڭ ءوسۋى ۇلتتىق بانك باعالاۋىنىڭ جوعارعى شەگىنە جاقىن قالىپتاستى»، - دەدى ۇ ب ءتوراعاسى ب ا ق وكىلدەرىنە ارنالعان بريفينگتە.
ونىڭ دەرەگىنشە، 2022-جىلى ءۇي شارۋاشىلىقتارىنىڭ سۇرانىسى وڭ ديناميكاسىن ساقتاعانمەن، ءوسۋ قارقىنى باياۋ بولدى.
بۇعان حالىقتىڭ ناقتى كىرىستەرىنە تەرىس ىقپال ەتكەن جوعارى ينفلياتسيا سەبەپ بولدى.
«تۇتىنۋشىلىق كرەديتتىڭ ءوسۋى دە سۇرانىسقا اسەر ەتتى. 2022-جىلعى قاراشا ايىنىڭ سوڭىندا تۇتىنۋشىلىق كرەديتتەر جىل باسىنان باستاپ 7,6 تريلليون تەڭگەگە دەيىن 24,1 پايىزعا ۇلعايدى. ءىرى بانكتەردىڭ ماركەتينگتىك اكتسيالارى تۇتىنۋشىلىق كرەديتتەۋدىڭ وسۋىنە ىقپال ەتتى. وسىعان بايلانىستى بولشەك ساۋدا اينالىمىنىڭ ديناميكاسى تۇراقتى ءوسىم قارقىنىن كورسەتەدى»، - دەدى عالىمجان ءپىرماتوۆ.
