بانكروتتىق راسىمدەۋگە ءوتىنىش بەرۋ ناۋرىزدا باستالادى

None
استانا. قازاقپارات - ەلوردا تۇرعىندارىمەن كەزدەسكەن قارجى ۆيتسە- ءمينيسترى ەرجان ءبىرجانوۆ بانكروتتىق راسىمدەۋ ءۇشىن ءوتىنىش بەرۋ ءتارتىبىن ءتۇسىندىردى، دەپ حابارلايدى قازاقپارات ءتىلشىسى.

ەرجان ءبىرجانوۆتىڭ ايتۋىنشا، قارىزى بار ازاماتتار 2023 -جىلدىڭ ناۋرىز ايىنان باستاپ بانكروتتىققا ارىز بەرە الادى. سوتتان تىس بانكروتتىق راسىمدەۋ مەملەكەتتىك كىرىستەر ورگاندارى ارقىلى جۇرگىزىلەدى. ازاماتتار بۇل قىزمەتتى ەلەكتروندى نىساندا «egov.kz» پورتالى جانە «e-Salyq Azamat» موبيلدى قوسىمشاسىنىڭ كومەگىمەن الۋىنا بولادى. كەيىن ءوتىنىش مەملەكەتتىك كىرىستەر كوميتەتىنىڭ اقپاراتتىق جۇيەسىنە تۇسەدى. وسى دەرەكتەردى العاننان سوڭ جاۋاپتى مەملەكەتتىك جانە باسقا ورگاندار بورىشكەردىڭ بانكروتتىق راسىمدەۋگە جاتاتىن ساناتقا سايكەستىگىن تەكسەرەدى. ازاماتتىڭ ءوتىنىشى تالاپتارعا ساي كەلسە نەمەسە ونى قۇزىرلى ورگان بانكروت دەپ تانۋدان باس تارتسا، ءتيىستى حابارلاما «egov.kz» پورتالىنداعى «جەكە كابينەتىنە» كەلەدى.

«سوتتان تىس بانكروتتىقتى ازاماتتار تەك كەلەسى شارتتاردى ورىنداي وتىرىپ راسىمدەيدى: بانك، ميكروقارجى ۇيىمدارى مەن كوللەكتورلار الدىنداعى بەرەشەك 5,5 ميلليون تەڭگەدەن نەمەسە 1600 اەك- تەن اسپاسا، ءوتىنىش بەرگەن كۇننەن باستاپ قاتارىنان 12 اي ىشىندە مىندەتتەمەلەرى وتەلمەگەن بولسا جانە ءوتىنىش بەرۋشىنىڭ مۇلكى بولماعان جاعدايدا.

بورىشكەر اۋەلى بانكپەن بەرەشەگى بويىنشا جۇمىس جۇرگىزۋى ءتيىس. سونىمەن قاتار، بانكروت دەپ تانىلعاندارعا بۇل شارا تەك 7 جىلدان كەيىن عانا قايتا قولدانىلادى. بانكروتتىق 6 اي ىشىندە اتاۋلى الەۋمەتتىك كومەك الاتىن ازاماتتارعا جانە 5 جىلدان استام ۋاقىت قارىزى وتەلمەگەن ازاماتتارعا راسىمدەلەدى»، - دەدى ەرجان ءبىرجانوۆ.

قارىزى 5,5 ميلليون تەڭگەدەن اساتىن بورىشكەرلەر سوت بانكروتتىعىنا جۇگىنە الادى. ەگەر جالعىز تۇرعىن ءۇي كەپىل زاتى رەتىندە قارالسا، وندا كرەديتور ونى قايتارىپ الۋعا قۇقىلى. ال، جالعىز باسپانا كەپىل بولماسا، كرەديتورلار ونى تالاپ ەتە المايدى. قالعان وتەلمەگەن سوما، ەگەر تولەۋگە مۇمكىندىگى جوق بورىشكەر بولماسا، ەسەپتەن شىعارىلۋى ءتيىس.

ءۇشىنشى ءراسىم - تولەم قابىلەتىن قالپىنا كەلتىرۋ. تۇراقتى تابىس بولعان جاعدايدا قارىزدى تولەۋ ءۇشىن 5 جىلعا دەيىن سوت تارتىبىمەن ءبولىپ تولەۋ مۇمكىندىگىن الۋعا بولادى. بۇل پروتسەدۋرا قارجى باسقارۋشىمەن بىرلەسە ازىرلەنىپ، سوتتا بەكىتىلەدى. اتالعان مەحانيزمنىڭ ارتىقشىلىعى - ادامعا «بانكروت» مارتەبەسى بەرىلمەيدى. تيىسىنشە، بانكروت ءۇشىن كوزدەلگەن سالدار وعان قولدانىلمايدى.

سوڭعى جاڭالىقتار