قازىر جەلىلەردە بانكروتتىق راسىمدەپ بەرۋگە ۋادە ەتەتىن الاياقتار پايدا بولدى - ەرجان ءبىرجانوۆ

استانا. قازاقپارات - ەلوردا تۇرعىندارىمەن كەزدەسكەن قارجى ۆيتسە-ءمينيسترى ەرجان ءبىرجانوۆ بانكروتتىق راسىمدەۋ كەزىندە بەيرەسمي مالىمەتتەرگە جۇگىنىپ، الاياقتارعا الدانىپ قالماۋعا شاقىردى، دەپ حابارلايدى قازاقپارات ءتىلشىسى.

«قازىر جەلىلەردە ايلاكەرلەر پايدا بولدى. ولار «ماعان 10 پايىزىن بەرسەڭىز، مەن ءسىزدى بانكروت دەپ تانيمىن» دەپ ۋادە بەرەدى. ونداي حابارلامالارعا جۇگىنىپ كەرەك ەمەس. سەبەبى تۇرعىندار الدانىپ قالادى. ءبىز ايتقىمىز كەلەدى: بانكروتتىق پروتسەستەر تەگىن تۇردە وتكىزىلەدى. بۇل - مەملەكەت تاراپىنان جاسالعان شارا. سوندىقتان بۇعان مەملەكەت پەن ازامات قانا قاتىسا الادى. ءۇشىنشى جاقتىڭ بۇل ىسكە قوسىلۋى ءتيىس ەمەس»، - دەپ ءمالىم ەتتى ەرجان ءبىرجانوۆ.

ۆيتسە-مينيستر سوزىنشە، ەگەر بانكروتتىقتى راسىمدەۋ كەزىندە الاياقتىق فاكتىلەرى انىقتالسا، وندا بۇل تۋرالى اقپارات دەرەۋ قۇقىق قورعاۋ ورگاندارىنا بەرىلەدى. كەيىن ايلاكەردىڭ ارەكەتىنە ءتيىستى باعا بەرىلىپ، قاجەت بولعان جاعدايدا قىلمىستىق ءىس قوزعالادى. سوندىقتان ەرجان ءبىرجانوۆ بانكروت دەپ تانۋ جونىندەگى وتىنىشتەر مەن اقپاراتتى تەك مەلەكەتتىك ورگانداردان الۋ كەرەكتىگىن ايتتى.

سونىمەن قاتار، استانا قالاسىنىڭ تۇرعىندارىمەن كەزدەسىپ، زاڭدى تۇسىندىرگەن ۆيتسە-مينيستر ازاماتتاردى بانكروت دەپ تانۋ - قارىزدى كەشىرۋ اكتسياسى ەمەس ەكەندىگىن باسا ايتتى. سەبەبى مۇنىڭ زاڭمەن رەتتەلەتىن سالدارى بار.