ايدوس سارىم ەلباسى تۋرالى زاڭ كۇشىن جويعاننان كەيىن ونىڭ تۋىستارى «تيىسپەۋشىلىك» مارتەبەسىنەن ايىرىلاتىنىن ايتتى

None
استانا. قازاقپارات - پارلامەنت پالاتالارىنىڭ بىرلەسكەن وتىرىسىنان كەيىن ءماجىلىس دەپۋتاتى ايدوس سارىم ب ا ق وكىلدەرىنە «زاڭنىڭ كەرى كۇشى جوق» قاعيداتى بۇرىنعى پرەزيدەنت تۋىستارىن قانداي جاعدايدا قورعاي الاتىنىن ءتۇسىندىردى، دەپ حابارالايدى قازاقپارات ءتىلشىسى.

«ادىلەت ءمينيسترى ەلباسى تۋرالى كونستيتۋتسيالىق زاڭ كۇشىن جويعاننان كەيىن ونىڭ تۋىستارى «تيىسپەۋشىلىك» مارتەبەسىنەن ايىرىلاتىنىن ايتتى. ءبىراق ولاردىڭ وسى زاڭ كۇشىن جويعانعا دەيىن جاساعان ارەكەتتەرى ءۇشىن جاۋاپقا تارتىلمايتىنى ايتىلدى. بۇعان قانداي پىكىر بىلدىرەسىز؟» دەپ سۇرادى ب ا ق وكىلى.

ايدوس سارىمنىڭ ايتۋىنشا، بۇل ماسەلە نۇرسۇلتان نازاربايەۆ تۋىستارى ارەكەتىنىڭ سيپاتىنا بايلانىستى.

«تۇسىنەسىز بە، «زاڭنىڭ كەرى كۇشى جوق» دەيتىن قاعيدات بار. مىسالى، قازىر ساموكاتقا قاتىستى زاڭ نورمالارى قارالىپ جاتىر. كەيىن وسى ساموكات بويىنشا ءبىرقاتار سانكسيالار قابىلدانۋى مۇمكىن. جىلدامدىقتى اسىرساڭىز، ايىپپۇل سالۋى مۇمكىن دەگەن سياقتى. ءبىراق ءبىر جىل بۇرىن جىلدامدىقتى اسىرىپ جۇيتكىپ جۇرگەنىڭ ءۇشىن زاڭ قابىلدانىپ بولعاننان كەيىن جازاعا تارتا المايدى عوي. بۇل جەردە دە وسىنداي پرينتسيپ بار»، - دەدى ايدوس سارىم.

سونداي- اق، ول مۇنداي كۇردەلى ماسەلەلەر كونستيتۋتسيالىق سوت ارقىلى رەتتەلەتىنىن ەسكە سالدى.

«الايدا، ءبىر جاعىنان، كونستيتۋتسيالىق سوت بار. قانداي دا ءبىر ماسەلەلەر تالقىلاناتىن بولسا، كونستيتۋتسيالىق سوت ءاربىر وقيعا نەمەسە ءاربىر نورماتيۆتىك اكت بويىنشا شەشىم قابىلدايدى. ودان كەيىن ەسكىرۋ مەرزىمى جوق قىلمىستار بار. ايتالىق كىسى ءولتىرۋ، گەنوتسيد دەگەن سياقتى. ولاردىڭ مۇنداي قىلمىستارعا قاتىسقان- قاتىسپاعانان مەن بىلمەيمىن. ءبىراق ونداي ىستەر بولسا، ەرەكشە جاعداي بولادى»، - دەدى دەپۋتات.

اۆتور

ەسىمجان ناقتىباي

سوڭعى جاڭالىقتار