پەتروپاۆلدا ورتتەن ەر ادامدى كوتەرىپ شىعارعان بويجەتكەن ماراپاتتالدى

پەتروپاۆل. قازاقپارات - پەتروپاۆل قالاسىنىڭ تۇرعىنى ماريا سيمونوۆا «ورتتە كورسەتكەن قايسارلىعى ءۇشىن» مەدالىمەن ماراپاتتالدى.

جاقىندا بويجەتكەن جانىپ جاتقان ۇيدەن ەر ادامدى الىپ شىعىپ، ونى امان الىپ قالعان ەدى، دەپ حابارلايدى قازاقپارات ءتىلشىسى.

ماريا سيمونوۆاعا ءورت كەزىندە كورسەتكەن باتىلدىعى مەن ازاماتتىق بورىشىن ادال ورىنداعانى ءۇشىن لايىقتى ماراپات - «ورتتە كورسەتكەن قايسارلىعى ءۇشىن» مەدالى سالتاناتتى تۇردە تابىس ەتىلدى. سولتۇستىك قازاقستان وبلىسى توتەنشە جاعدايلار دەپارتامەنتىنىڭ مالىمەتىنشە، جاڭا جىلدىڭ العاشقى كۇنى كەشكە ماريا سيمونوۆا جۇمىسشى كەنتىندەگى ك. تسەتكين كوشەسى، 90 «ا» مەكەنجايىنداعى ۇيدەن ءورت شىققانىن بايقاپ قالادى. قالىڭ ءتۇتىندى كورگەن ول بىردەن كومەككە ۇمتىلادى. ءۇيدىڭ ەسىگىن اشقان قىز ەسىككە جەتە الماي ەڭبەكتەگەن ەر ادامعا شىعۋعا كومەكتەسەدى. كەيىن دەرەۋ ءورت سوندىرۋشىلەردى شاقىرعان.

«مەن كورە سالا جۇگىردىم، ول كەزدە بىردەڭەنى ويلاۋعا دا مۇرشام بولمادى. ەر ادامدى كوتەرىپ شىعارۋعا قالاي كۇشىمنىڭ جەتكەنىنە قازىر تاڭ قالامىن. قورشاۋدىڭ جانىنا وتىرعىزىپ، ەسىن جيعىزدىم. ول ۇيدە تاعى ءبىر ەر ادامنىڭ بارلىعىن ايتتى. ءبىراق وندا قايتا كىرۋ مۇمكىن ەمەس ەدى. بۇل كەزدە ءورت سوندىرۋشىلەر دە كەلىپ ۇلگەردى»، - دەيدى ماريا سيمونوۆا.

قۇتقارىلعان 32 جاستاعى ەر ادامنىڭ قول مەن باسى شامالى كۇيىك العان، اۋرۋحاناعا جاتقىزۋدىڭ قاجەتى بولمادى. ماريا سيمونوۆا اتا-اناسىمەن بىرگە ءورت بولعان ۇيگە جاقىن جەردە تۇرادى. بويجەتكەن پەتروپاۆلداعى تەحنيكالىق كوللەدجىنىڭ 4 كۋرس ستۋدەنتى، تەحنيك-مەحانيك ماماندىعىنا وقىپ جاتىر.