قاڭتار وقيعاسى: اقتوبەدە قىلمىستىق ىستەر بويىنشا جارىس ءسوز باستالدى
قاڭتار وقيعاسىنان سوڭ قوزعالعان قىلمىستىق ءىس «جاپپاي تارتىپسىزدىك»، «قۇقىق قورعاۋ ورگانى، ارناۋلى مەملەكەتتىك ورگان قىزمەتكەرىنىڭ، اسكەري قىزمەتشىنىڭ ومىرىنە قولسۇعۋشىلىق»، «قارۋدى، وق-دارىلەردى، جارىلعىش زاتتار مەن جارىلىس قۇرىلعىلارىن جىمقىرۋ نە قورقىتىپ الۋ» باپتارى بويىنشا قارالىپ جاتىر.
بۇگىن جارىس ءسوز كەزىندە مەملەكەتتىك ايىپتاۋشى سوتتالۋشى اجنيازوۆقا قاتىستى قىلمىستىق كودەكستىڭ 272-بابى 1-بولىگىن 272-بابىنىڭ 2-بولىگىنە وزگەرتۋدى ۇسىندى. بۇل باپ بويىنشا 4 جىلدان 8 جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن.
سونىمەن بىرگە كولىگىمەن پوليتسيا قىزمەتكەرلەرىن قاعىپ كەتتى دەپ ايىپتالىپ جاتقان سوتتالۋشى يسايەۆقا قاتىستى تەرگەپ-تەكسەرۋ جۇرگەن كەزدە كولىكتىڭ تەجەگىشى جۇمىس ىستەپ تۇرعانى انىقتالعان. پوليتسيا كولىكتى بەينەكامەرالار ارقىلى تاۋىپ، جۇرگىزۋشىسىن دە ۇستادى. ال الاڭعا قيىرشىق تاس تاسىمالداۋعا تاپسىرىس بەرگەن ابيەۆ سوتتا ءوز كىناسىن مويىندادى. سول جۇك كولىگىن جۇرگىزگەن قۇتتىبايەۆ پەن بايمۇراتوۆ تا سوتتا جاۋاپ بەرىپ جاتىر.
سوت وتىرىسى كەزىندە مەملەكەتتىك ايىپتاۋشى سوتتالۋشىلاردىڭ ءارقايسىسىنا جەكە-جەكە توقتالىپ، تاعىلعان ايىپتى، ولاردىڭ ءىس-ارەكەتىن تىزبەكتەپ بەردى. مەملەكەتتىك ايىپتاۋشىنىڭ ايتۋىنشا، سوت وتىرىسى كەزىندە بىرنەشە سوتتالۋشى تاعىلعان ايىپپەن كەلىسپەي، كىناسىن مويىندامادى. سونىمەن بىرگە مەملەكەتتىك ايىپتاۋشى، كەيبىر سوتتالۋشىلاردىڭ جازاسىن جەڭىلدەتۋدى سۇرادى.
«اجنيازوۆتى 4 جىلعا باس بوستاندىعىنان ايىرۋدى سۇرايمىز. «راقىمشىلىق تۋرالى» زاڭعا سايكەس جازاسىن جەڭىلدەتىپ، تۇپكىلىكتى 1 جىلعا باس بوستاندىعىنان ايىرۋدى سۇرايمىز.
سوتتالۋشى يسايەۆتى قىلمىستىق كودەكستىڭ «قۇقىق قورعاۋ ورگانى، ارناۋلى مەملەكەتتىك ورگان قىزمەتكەرىنىڭ، اسكەري قىزمەتشىنىڭ ومىرىنە قولسۇعۋشىلىق» جانە «جاپپاي تارتىپسىزدىك» باپتارى بويىنشا ايىپتى دەپ تانىپ، تۇپكىلىكتى 15 جىلعا باس بوستاندىعىنان ايىرۋدى، مۇلكى تاركىلەۋدى سۇرايمىز. كولىگى مەملەكەت كىرىسى ءۇشىن تاركىلەنسىن.
سوتتالۋشى مۇحيتتى 1 جىل 9 ايعا، ابيەۆتى 10 اي 15 كۇنگە، قۇتتىبايەۆتى 9 ايعا، بايمۋراتوۆتى 9 ايعا باس بوستاندىعىنان ايىرۋدى سۇرايمىز. جۇك كولىگىن جۇرگىزىپ، الاڭعا قيىرشىق تاس جەتكىزگەن قۇتتىبايەۆ پەن بايمۇراتوۆتىڭ كولىگىن مەملەكەت كىرىسىنە تاركىلەۋدى سۇرايمىز.
سوتتالۋشى يسكاكوۆتى تۇپكىلىكتى 9 ايعا، قۇسپانوۆتى 9 ايعا، ءومىرالىنى 9 ايعا، وماروۆتى 1 جىل 15 كۇنگە، سادۋاقاسوۆتى 10 اي 15 كۇن، داۋكەندى 10 اي 15 كۇنگە، امانعوسوۆتى 10 اي 15 كۇنگە، بەكەيەۆتى 10 اي 15 كۇنگە، احمەتوۆتى 10 اي 15 كۇنگە، قاميدى 4 جىلعا، ەسمۋرزايەۆانى 10 اي 15 كۇنگە باس بوستاندىعىنان ايىرۋدى سۇرايمىز.
سوتتالۋشى شامۋراتوۆتى ايىپتى دەپ تانىپ، قىلمىستىق كودەكستىڭ «جاپپاي تارتىپسىزدىك» بابى بويىنشا ايىپتى دەپ تانىعانىمەن، «راقىمشىلىق تۋرالى» زاڭعا سايكەس جازادان بوساتۋدى سۇرايمىز»، - دەدى جارىس ءسوز كەزىندە مەملەكەتتىك ايىپتاۋشى.
سوت وتىرىسى كۇنى بويى ءوتتى. جارىس ءسوز كەزىندە ايىپتالۋشىلار مەن ولاردىڭ قورعاۋشىلارى دا سويلەدى. كەلەسى سوت وتىرىسى 17- قاڭتاردا جالعاسادى.
