قانداستار قاي ءوڭىردى تاڭداسا دا ازاماتتىق الۋدا كەدەرگى بولمايدى - كوشى- قون كوميتەتى

استانا. قازاقپارات - كوشى- قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ قانداستاردىڭ كوشىن ەڭبەك كۆوتالارى مەن بەيىمدەۋ ورتالىقتارى ارقىلى رەتتەۋ نە ءۇشىن قاجەت بولعانىن ءتۇسىندىردى، دەپ حابارلايدى قازاقپارات ءتىلشىسى.

«قانداستار كوشىن ەڭبەك كۆوتالارى مەن بەيىمدەۋ ورتالىقتارى ارقىلى رەتتەۋ ساياساتى حالىقارالىق زاڭناما مەن ادام قۇقىقتارىنىڭ تالاپتارىنا قانشالىقتى ساي كەلەدى؟»، - ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا ماجىلىسىنەن كەيىن ب ا ق وكىلدەرى ءىلياس يسپانوۆقا وسىنداي ساۋال قويدى.

«وتانداستار» قورىندا بۇل ماسەلە تالقىلانعان كەزدە جوبانىڭ باستاپقى نۇسقاسى قارالعان. ول جەردە «قانداستاردىڭ بەلگىلى ءبىر وڭىرلەرگە كوشىپ كەلۋىنە بولمايدى» دەگەن شەكتەۋ بولدى. بۇل شەكتەۋ قازىر الىنىپ تاستالدى. تەك قانداسقا بەرىلەتىن كۆوتادان قاعىلادى»، - دەپ ءتۇسىندىردى كوميتەت باسشىسى.

ونىڭ ايتۋىنا قاراعاندا، قانداستاردىڭ ماماندىعى مەن ءبىلىمى قونىس اۋدارۋ جانە بەيىمدەلۋ شىعىندارىن كوتەرمەلەۋ ماسەلەسىندە عانا ەسكەرىلەدى. ال ازاماتتىق الۋ ماسەلەسىندە ەشقانداي شەكتەۋ جوق.

«ەگەر جۇمىس ورنىنىڭ تاپشىلىعى بار وڭىرلەرگە بارسا، كۆوتا بەرىلەدى. ال وڭتۇستىك وڭىرلەرگە باراتىن بولسا، كوشپەي تۇرىپ بەيىمدەۋ ماسەلەسىن تولىق شەشۋى كەرەك. سوندا عانا قونىس اۋدارا الادى. قازىر پراكتيكادا مىنانداي جايتتار كوپ. ءوز بەتىمەن ءبىر جەرگە بارادى، تۇراتىن جەرى جوق - قايتادان اكىمشىلىككە كەلەدى. قايتادان ءوتىنىش ايتادى. سوندىقتان ەلگە كەلىپ الىپ قينالماۋ ءۇشىن، ءبىرىنشى، بەيىمدەۋ ورتالىقتارى ارقىلى وسى ماسەلەلەردىڭ ءبارىن شەشىپ الۋى كەرەك بولادى. ال ازاماتتىق الۋ ماسەلەسى بويىنشا قاي ءوڭىردى تاڭداسا دا ەشبىر كەدەرگى بولمايدى»، - دەدى ءىلياس يسپانوۆ.