وقۋشى قىزداردىڭ ءبىر-ءبىرىن اياۋسىز سوققىعا جىعىپ، قاتىگەزدىككە بارۋىنا نە سەبەپ؟

None
استانا. قازاقپارات - بىرنەشە كۇن بۇرىن تالدىقورعانداعى سۇمدىق جايت جۇرتقا جاريا بولدى. مەكتەپ وقۋشىلارى قۇربىسىن اياۋسىز ۇرىپ، سول ساتتەگى ۆيدەونى الەۋمەتتىك جەلىدەگى پاراقشالارعا جاريالاپ جىبەرگەن.

بۇل ماسەلە قوعامدا قىزۋ تالقىعا ءتۇستى. كوپتەگەن ادام وقۋشىنى اياۋسىز سوققىعا جىققان قىزداردى پسيحولوگيالىق تۇرعىدا ەمدەۋ كەرەگىن، بۇل دۇرىس ەمەس ەكەنىن ايتىپ جاتىر.

Massaget.kz ءتىلشىسى وسى ماسەلە بويىنشا پسيحواناليز باعىتى بويىنشا پسيحوتەراپەۆت-پسيحولوگ ەلۆيرا قاسىممەن سويلەسىپ، قىزداردىڭ قاتىگەزدىككە بارۋىنا نە سەبەپ بولۋى مۇمكىن ەكەنىن سۇرادى.

قىزداردىڭ قاتىگەزدىككە بارۋىنىڭ ەكى نەگىزگى سەبەبى بار

ەلۆيرا قاسىمنىڭ سوزىنشە، مەكتەپ وقۋشىلارىنىڭ، جاسوسپىرىمدەردىڭ اياۋسىزدىققا بارۋىنىڭ ەڭ نەگىزگى ەكى سەبەبى بار. ونىڭ ءبىرىنشىسى - بالانىڭ ىشكى قۇشتارلىعى.

«كەز كەلگەن ادامدا اگرەسسيا بولادى. اگرەسسيا بولماسا ومىرگە كەلمەيتىن دە ەدىك. ءتىپتى ومىرگە كەلۋ پروتسەسىنىڭ ءوزى ۇلكەن اگرەسسيا اسەرىنەن بولادى. اگرەسسياسى از ايەل ءوز كۇشىمەن كۇشەنىپ، بالا تۋا الماس ەدى. اگرەسسيا سەزىمىمەن ويانامىز. جاسوسپىرىمدەر نە ءۇشىن اگرەسسيالىق ارەكەت جاسايدى؟ مىسالى، باستاۋىش سىنىپتاردا كىشكەنتاي قىزدار ءوزارا كيكىلجىڭگە ءتۇسىپ جاتادى. سىرتتاي قاراعاندا 3-4-سىنىپ وقۋشىلارىنا نە جەتپەيدى دەپ ويلاۋىمىز مۇمكىن. ءبىراق قاي سىنىپتا وقىسا دا ءوزارا سوزگە كەلىسە الماي جاتادى. جاسوسپىرىمدىك كەزەڭگە قادام باسقان كەزدە دە كيكىلجىڭدەر بولادى»، - دەيدى مامان.

ءبىراق كيكىلجىڭدى وزىنشە شەشەتىن بالالار دا بولادى. ونىڭ استارىندا ادامنىڭ ليبيدوسى (زيگمۋند فرەيد جىنىستىق قاتىناستىڭ ءارتۇرلى كورىنىستەرىن سيپاتتاۋ ءۇشىن جاساعان پسيحواناليزدىڭ نەگىزگى ۇعىمدارىنىڭ ءبىرى - ەسك.) جاتىر. ادام ليبيدومەن ومىرگە كەلەدى، ول ومىرگە قۇشتارلىق دەگەن ءسوز. ومىرگە قۇشتارلىعى از بولعان بالا تۋعان كەزدە-اق شەتىنەپ كەتەدى نەمەسە ومىرگە كەلمەي جاتىپ شەتىنەپ كەتەدى.

«ال ليبيدو - تەك جىنىستىق قۇشتارلىق ەمەس، ول جالپى قۇشتارلىق، ومىرگە دەگەن قۇشتارلىق. كىشكەنتاي كۇنىمىزدەن پسيحيكالىق دامۋ ءجۇرىپ جاتادى. ال بالا پسيحوسەكسۋالدىق قۇشتارلىعىن ساۋاتتى اتا-انا ارقىلى سۋبليماتسيالاماسا، ياعني باعىتتالماسا ول اگرەسسيا كۇيىندە شىعىپ كەتۋى مۇمكىن. كوزى اشىق، پسيحولوگيالىق تۇرعىدا ساۋاتتى اتا-انا بالادا ليبيدو بار ەكەنىن ءبىلىپ، ونى ۇيىرمەلەرگە قىزىعۋشىلىعىنا ساي بالانىڭ ىشكى قۇشتارلىعى دەنەسىنە ءوتىپ كەتپەۋى ءۇشىن ارەكەتتەر جاسايدى. سوندىقتان قىزىعۋشىلىعى مي دەڭگەيىنە ءوتۋى ءۇشىن اتا-انالار بالاسىن ۇيىرمەلەرگە، قوسىمشا ساباقتارعا جىبەرە الادى»، - دەيدى پسيحولوگ.

دەمەك، اگرەسسيا تۋىنداۋىنىڭ ءبىرىنشى سەبەبى - جىنىستىق قۇمارلىقتىڭ تابيعي جولمەن قاناعاتتانباۋىندا جانە ىشكى كيكىلجىڭ بولۋىندا.

«كەز كەلگەن جاس ءوسپىرىم ىشكى كيكىلجىڭمەن ارپالىسادى. ال ىشكى كيكىلجىڭى كوپ بولعان بالا سىرتقى ورتاعا دا سىرتقى كيكىلجىڭ ورتانى قالىپتاستىرادى»، - دەيدى ەلۆيرا قاسىم.

ماماننىڭ ايتۋىنشا، قىزداردىڭ قاتىگەزدىككە بارۋىنا تاعى ءبىر سەبەپ - وتباسىنداعى جاعداي بولۋى مۇمكىن.

«ۇيادا نە كوردى، ۇشقاندا سونى ىستەيدى». مىسالى، شاي ىشكەنىڭىز اناڭىزعا ۇقساۋى مۇمكىن، اكەڭىز سياقتى سويلەۋىڭىز مۇمكىن. بارلىق ادام سايكەستەندىرۋدەن وتەدى. سول سەكىلدى اگرەسسورعا سايكەستەندىرۋ دەگەن بار. وتباسىنداعى اتا-انا نە ۇلكەندەر ءبىر-بىرىمەن قارىم-قاتىناستا جانجالدى اگرەسسيا ارقىلى شەشەتىن وتباسىلار بولادى. سوندىقتان بالا وزگە ورتادا اگرەسسورمەن سايكەستەندىرۋ جاسايدى. ياعني بىرىگىپ كەتەدى. بالا ۇيدە ونى كورسەتپەسە دە سىرتقى ورتادا ءوزىن سولاي ۇستاۋى مۇمكىن«، - دەيدى مامان.

قىزداردىڭ ارەكەتىن اۋىتقۋ دەپ اتاۋعا بولا ما؟

پسيحولوگتىڭ سوزىنشە، قىزداردىڭ ارەكەتىن اۋىتقۋ دەپ اتاۋعا كەلمەيدى. ءبىراق مۇنى پسيحولوگپەن بىرنەشە ساعات جۇمىس ىستەۋ ارقىلى شەشۋگە بولادى.

»سەبەبى اۋىتقۋ تۋرالى تولىق شەشىم قابىلداي المايمىز. مىسالى، قانداي دا ءبىر قىلمىسكەردىڭ تاريحىن قاراساڭىز، ولار ادام قاتتى قينالىپ جاتقان كەزدەگى اسەرىن كورگىسى كەلگەن. قىلمىسكەرلەردىڭ سەزىمتالدىق دەڭگەيى وتە تومەن بولادى. سول ءۇشىن قىلمىسقا بارۋى مۇمكىن. ال قىزداردىڭ وقيعاسىنا قاتىستى ايتارىم، ماماندارعا جۇگىنسە دەيمىن. تەك وزدەرى ەمەس، اتا-اناسىمەن كەلىپ، پسيحولوگپەن 10-15 ساعات جۇمىس ىستەسە بۇل شەشىلەتىن پروبلەما دەپ ويلايمىن«، - دەيدى پسيحولوگ.


سوڭعى جاڭالىقتار