رەسەي گازىنىڭ ەكسپورتى كۇرت ازايدى

None
استانا. قازاقپارات - رەسەي گازىنىڭ ەكسپورتى سوڭعى 5 كۇندە كۇرت تومەندەدى. Reuters اگەنتىگىنىڭ حابارلاۋىنشا، ەۋروپادا كۇتپەگەن جەردەن كۇن جىلىپ كەتكەندىكتەن، قاڭتاردا رەسەي گازىنا سۇرانىس ازايعان.

وسى سەبەپتى كوك وتىننىڭ باعاسى ەكى ەسە ارزاندادى. ال ەۋروپالىق قويمالار 80 پايىزعا تولى تۇر. ەۋروپادا ماسكەۋ كۇتكەن گاز داعدارىسى بولماي قالدى - ماڭىزدى نارىعىنان ايىرىلعان. رەسەي ەندى ماسەلەنى قالاي شەشپەك؟

ۋكراينا ارقىلى تاسىمالداناتىن رەسەي گازى سوڭعى 5 كۇندە 40 ميلليون تەكشە مەتردەن 35-كە ءتۇستى. بىلتىر كوگىلدىر وتىننىڭ ەۋروپاعا ەكسپورتى بۇرىن- سوڭدى بولماعان مينيمۋمعا جەتتى. بلۋمبەرگتىڭ بولجامى بويىنشا، بۇل ءۇردىس بيىل دا جالعاسادى.

رەسەي ەندى ەۋروپاعا ەكسپورتتالۋى ءتيىس - 80 ميلليارد تەكشە مەتر گازدى تۇركياعا جونەلتە مە الدە قىتايعا ەكسپورتتاي ما؟ ساراپشىلار نە دەيدى؟

ۆياچەسلاۆ ميشەنكو، رەسەي مەملەكەتتىك مۇناي جانە گاز ۋنيۆەرسيتەتىنىڭ وكىلى:

- گازدى ورتالىق ازيا نەمەسە كاۆكاز ەلدەرىنە، ءازىربايجانعا، تۇرىكمەنستانعا جەتكىزۋ مۇمكىندىگى بار. ءبىراق تۇركىمەنستانعا رەسەي ارقىلى جەتكىزۋ كەرەك نەمەسە بۇل مەملەكەتكە ترانسكاسپيگە قوسىلۋ قاجەت. بۇل رەتتە قازاقستان رەسەيمەن گازدى ءتيىمدى باعادا ساتىپ الۋ كەلىسىمىن جاساۋى ابدەن مۇمكىن. ال قازىر ەكى ەل اراسىنداعى ساۋدا نەگىزىنەن ورىنبور مۇناي وڭدەۋ زاۋىتىندا قازاقستاندىق گازدى قايتا وڭدەۋگە نەگىزدەلگەن.

مارسەل ساليحوۆ، ەنەرگەتيكا جانە قارجى ينستيتۋتىنىڭ پرەزيدەنتى:

- رەسەي قازىر قازاقستانعا گاز جونەلتىپ جاتقان جوق. ءبىراق، ەكونوميكالىق تۇرعىدان سولتۇستىك قازاقستان ءۇشىن ونى ساتىپ الۋ ءتيىمدى بولماق. وڭتۇستىكتەگى گازدى سولتۇستىكتە پايدالانۋ مۇمكىن ەمەس. بۇل تۇرعىدا جاڭا ينفراقۇرىلىمدى سالۋدان گورى رەسەيدەن قازاقستاننىڭ سولتۇستىك وڭىرىنە جونەلتۋ دۇرىس دەپ سانايمىن.

سونىمەن ساراپشىلار بولجامىنشا، الەمدىك گاز نارىعىنداعى ءتۇيىن 2023 -جىلى تارقار ەمەس. ال رەسەي ءۇشىن گاز ينفراقۇرىلىمىن ەۋروپادان شىعىسقا بۇرۋ ءۇشىن كەمى ون جىل جانە 10 ميلليارد دوللار ينۆەستيتسيا قاجەت.

www.24.kz

سوڭعى جاڭالىقتار