كيىك سانىن رەتتەۋگە قاتىستى تىڭعىلىقتى زەرتتەۋ قاجەت - سكليار
بۇل تۋرالى ق ر پرەمەر-ءمينيسترىنىڭ ءبىرىنشى ورىنباسارى رومان سكليار ايتتى، دەپ حابارلايدى قازاقپارات ءتىلشىسى.
«جىل باسىندا مەملەكەت باسشىسى وسىمدىك دۇنيەسىنە جانە ەكولوگيالىق زاڭ بۇزۋشىلىقتارعا جاۋاپكەرشىلىكتى كۇشەيتۋگە قاتىستى ماڭىزدى زاڭداردى قابىلدادى. زاڭعا تاۋەلدى نورماتيۆتىك-قۇقىقتىق اكتىلەردى ساپالى ءارى ۋاقىتىلى ازىرلەۋدى قامتاماسىز ەتۋدى وتىنەمىن. براكونەرلەرمەن كۇرەس بارىنشا ساپالى دەڭگەيگە كوتەرىلۋى ءتيىس. قۇقىق قورعاۋ ورگاندارىمەن جانە وزگە دە تابيعاتتى قورعاۋ ۆەدومستۆولارىمەن ءوزارا ءىس-قيمىل ارقىلى كۇزەت ءىس-شارالارىنىڭ تيىمدىلىگىن ارتتىرۋ قاجەت»، - دەدى رومان سكليار ەكولوگيا جانە تابيعي رەسۋرستار مينيسترلىگىنىڭ كەڭەيتىلگەن القا ماجىلىسىندە.
ءبىرىنشى ۆيتسە-پرەمەر كيىك باسىن رەتتەۋگە قاتىستى ماسەلەگە دە توقتالىپ ءوتتى.
«مەملەكەت باسشىسى كيىك پوپۋلياتسياسىن رەتتەۋگە، ونىڭ ىشىندە ولاردى اۋلاۋ مۇمكىندىگىنە قاتىستى جۇمىستاردى جۇرگىزۋدى تاپسىردى. بۇل باعىتتا تىڭعىلىقتى عىلىمي زەرتتەۋ قاجەت. اتالعان ءىس-شارانى وسى جىلى باستاۋ كەرەك»، - دەدى ۇكىمەت باسشىسىنىڭ ءبىرىنشى ورىنباسارى.
