ءماجىلىس دەپۋتاتى كەنەسارى حاننىڭ باس سۇيەگى رەسەيدەن قايتارۋ ماسەلەسىن كوتەردى

None
استانا. قازاقپارات - بۇگىن ءماجىلىستىڭ جالپى وتىرىسىندا دەپۋتات باقىتبەك سماعۇل ماسكەۋدەگى مۋزەيدە كەنەسارى حاننىڭ باس سۇيەگى مەن مىلتىعى ۋاقىتشا ساقتاۋعا قويىلعانىن ايتتى، دەپ حابارلايدى قازاقپارات ءتىلشىسى.

«قازىرگى ۋاقىتتا كەنەسارى حاننىڭ باس سۇيەگى مەن ونىڭ مىلتىعى ماسكەۋدە ەتنوگرافيالىق مۋزەيدە ۋاقىتشا ساقتاۋدا تۇر. 2021 -جىلى گەوگرافيالىق قوعام ۇيىمداستىرىپ، قازاقستاننان ارنايى بارعان كوميسسيا جانە ماماندار ۇلى حاننىڭ باس سۇيەگى مەن مىلتىعىن سايكەستەندىرۋ جۇمىستارىمەن اينالىستى. تاريحي، انتروپولوگيالىق، مۋزەي جانە مۇراعات زەرتتەۋلەرى كەشەنىنىڭ قورىتىندىسىندا مىلتىقتىڭ حانعا 100 پايىز تيەسىلى ەكەنى، ال كەنەسارى حاننىڭ باس سۇيەگى جونىندەگى سايكەستىك %90 دان جوعارى ەكەنى ايتىلدى»، - دەدى ب. سماعۇل ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.

وسى ورايدا دەپۋتات كەنەسارى حاننىڭ سۇيەگى مەن مىلتىعىن رەسەيدەن قازاقستانعا قايتارۋ ماسەلەسىنە قولداۋ كورسەتۋدى سۇرادى.

«حان سۇيەگىن استاناداعى ۇلتتىق پانتەوندا جەرلەۋدى، ال مىلتىقتى ۇلتتىق مۋزەيگە تاپسىرۋدى ۇسىنامىن. بۇل شارا ەل رۋحىنىڭ اسقاقتاۋىنا، وتانشىلدىقتىڭ كۇشەيۋىنە جانە ەل استاناسىنداعى ءتۋريزمنىڭ دامۋىنا ىقپال ەتەرى ءسوزسىز»، - دەدى باقىتبەك سماعۇل.

بۇدان بۇرىن حابارلانعانداي، 2015 -جىلى عالىم حانگەلدى ءابجانوۆ كەنەسارىنىڭ باس سۇيەگىن ومبىدان ىزدەۋ كەرەك ەكەنىن ايتقان ەدى.

سونىمەن قاتار عالىم زيابەك قابۇلدينوۆ ومبىنىڭ مۋزەيىندە كەنەسارى حاننىڭ مىلتىعى ساقتاۋعا قويىلعانىن ايتا كەلە، وسى تاريحي جادىگەردى ەلگە قايتارۋ ماسەلەسىن كوتەرگەن ەدى.

سانكت- پەتەربۋرگتە كەنەسارى حاننىڭ كىسەسى ساقتالعانى انىقتالدى.

سوڭعى جاڭالىقتار