ءاليحان سمايىلوۆ بيىل بولاتىن ەكونوميكالىق وزگەرىستەردى اتادى

استانا. قازاقپارات - پرەمەر-مينيستر ءاليحان سمايىلوۆ «بيىل قازاقستان ەكونوميكاسىن نە كۇتىپ تۇر؟» دەگەن ساۋالعا جاۋاپ بەردى، دەپ حابارلايدى قازاقپارات ءتىلشىسى.

«جالپى، گەوساياسي جاعداي كۇردەلى بولىپ قالا بەرمەك. ءبىز ەكونوميكالىق بەلگىسىزدىك جاعدايىندا ءومىر ءسۇرۋدى جالعاستىرامىز. ەنەرگيا نارىعىندا قۇبىلمالىلىق، ازىق-تۇلىك باعاسىنىڭ ءوسۋى بولعاندىقتان، ءىرى ەكونوميكا بويىنشا رەتسەسسيا قاۋپى بار. مۇنداي جاعدايعا دايىنبىز. ءتۇرلى سەناريلەردى ىسكە اسىرۋ كەزىندە ءبىز ەكونوميكالىق ساياساتقا تۇزەتۋ ەنگىزەمىز. قاجەت بولعان جاعدايدا رەسپۋبليكالىق بيۋجەتتىڭ پارامەترلەرىن قايتا قارايمىز»، - دەدى ءاليحان سمايىلوۆ ۇكىمەت وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرە وتىرىپ.

ۇكىمەت باسشىسىنىڭ ايتۋىنشا، بيىل جىل قورىتىندىسى بويىنشا ەكونوميكانىڭ ءوسۋى كەمىندە %4- دى قۇرايدى دەگەن جوسپار بار.

«ينفلياتسيانى %9,5 دان اسپايتىن دەڭگەيگە تومەندەتۋ جولىندا جۇمىس ىستەيمىز. وسىنداي ماقسات قويىپ وتىرمىز، ول ءۇشىن ۇلتتىق بانكپەن بىرلەسىپ جۇمىس ىستەيمىز. ونەركاسىپتە، وڭدەۋ سەكتورىندا 1,1 تريلليون تەڭگەگە 150 گە جۋىق جوبانى ىسكە اسىرۋعا نيەتتىمىز. سول سياقتى اۋىل شارۋاشىلىعىندا 540 ميلليارد تەڭگەگە 265 ينۆەستيتسيالىق جوبانى ىسكە اسىرۋ جوسپارلانىپ وتىر. 400 مىڭنان استام جاڭا تۇراقتى جۇمىس ورنى قۇرىلىپ، بيىل ميلليونعا جۋىق ادام جۇمىسقا ورنالاستىرىلادى. تىكەلەي شەتەلدىك ينۆەستيتسيالار اعىنىن كەم دەگەندە 24,4 ميلليارد دوللارعا جەتكىزۋدى كوزدەيمىز. وسىلايشا، ەكونوميكامىزدىڭ ۇدەمەلى ءارى ورنىقتى دامۋىن كۇتەمىز»، - دەيدى ۇكىمەت باسشىسى.

سونداي-اق، پرەمەر-مينيستر ۋكرايناداعى گەوساياسي جاعدايدىڭ ەل ەكونوميكاسىنا قالاي اسەر ەتىپ جاتقانى تۋرالى ايتتى.

«بىرىنشىدەن، رەسەي مەن ۋكراينا - الەمدىك استىق، ازىق-تۇلىك جانە تىڭايتقىشتار نارىعىنداعى ءىرى جەتكىزۋشى ەلدەر. قازىرگى جاعداي الەمنىڭ بارلىق ەلىندەگى ازىق-تۇلىك ءال-اۋقاتىنا اسەر ەتىپ جاتىر. بۇل - ينفلياتسيالىق پروتسەستەر. وسى ورايدا، ازىق-تۇلىك، مينەرالدى تىڭايتقىشتار مەن ەنەرگيا باعاسىنىڭ وسۋىنە بايلانىستى الەمدىك رەتسەسسيا قاۋپى بار. ءبىز ەۋروپادان جانە ەۋروپاعا جۇك جەتكىزۋ بويىنشا لوگيستيكالىق پروبلەمالاردىڭ بارىن كورىپ وتىرمىز»، - دەپ ءتۇسىندىردى ءا. سمايىلوۆ.

ونىڭ مالىمدەۋىنشە، قازاقستان بارلىق ەلدەرمەن ساۋدا جانە ءوزارا ءىس-قيمىلدى ودان ءارى جالعاستىرادى.

«وتكەن جىلدىڭ قورىتىندىسى بويىنشا سىرتقى ساۋدا اينالىمى %33 عا ءوستى. ونىڭ ىشىندە ەكسپورت %42 عا، يمپورت %20- عا ارتتى. ءۇشىنشى ەلدەرمەن تاۋار اينالىمى %45- عا ۇلعايدى. ءوزارا ساۋدانى ۇلعايتۋ جولىندا ارىپتەس ەلدەرمەن ەكونوميكالىق ىنتىماقتاستىق جونىندەگى جۇمىستى جالعاستىرامىز»، - دەيدى پرەمەر-مينيستر.