ايتىسكەر اقىن سەرىكزات دۇيسەنعازى مارقۇم ۇلى تۋرالى جانتەبىرەنتەرلىك جازبا جاريالادى
ايتىسكەر اقىن Facebook-پاراقشاسىندا ۇلى ءاليحان تۋرالى جانتەبىرەنتەرلىك جازبا جازعان. سەرىكزات دۇيسەنعازىنىڭ وتباسى كۇتپەگەن وقىس جاعدايدان ەستى ەندى عانا جيىپ وتىرعانىن اتاپ ءوتتى.
«مۇنداي اۋىر سىناقتى اللا ەشكىمنىڭ باسىنا بەرمەسىن. قايعىرعانعا باسۋ ايتىپ، قامىققانعا اقىل ايتىپ جۇرگەن ادام بولسام دا جۇرەككە جازىلماس سىزات ءتۇستى. ەندى ونىڭ ەمى تەك اللانىڭ تۋرا جولى، يسلامنىڭ يمان بايلىعى عانا بولار. تاعدىرعا يمان كەلتىرگەن مۇسىلمانبىز عوي. بەرگەنىنە شۇكىرلىك قىلعان اللاعا العانىنا كۇپىرلىك قىلمايمىز»، - دەدى ايتىسكەر.
سەرىكزات دۇيسەنعازى ۇلىنىڭ قازاسىنان كەيىن كوڭىل ايتىپ، قولداۋ بىلدىرگەن قازاقستاندىقتارعا العىس ايتتى.
«الدىمەن، وسى ەڭ قيىن ساتىمدە قۇلىنشاعىمنىڭ قايعىسىن بولىسكەن بارشا قازاق حالقىنا پەرزەنتتىك ءھام اكەلىك العىسىمدى ايتامىن. توبەسىنە كوتەرگەن قارا ورمان حالقىم بولماسا ەشكىم ەمەس ەكەنىمدى بىلەمىن. اللا جازسا، ەندى قالعان عۇمىرىمدا قازاعىمنىڭ كەلەشەگى ءۇشىن قىزمەت ەتىپ وتەرمىن. مەن پرەزيدەنت قاسىم-جومارت كەمەل ۇلىمەن كەزدەسىپ سويلەسكەن ادام ەمەسپىن. باسىما قايعى تۇسكەندە ونى مەملەكەت باسشىسىنىڭ بولىسكەنىن ازاماتتىق دەپ سانايمىن. ءالى ءومىردىڭ ۇلكەن ەسىگىن اشىپ ۇلگەرمەگەن پەرىشتە بالام ءۇشىن مەنىمەن بىرگە قايعىرىپ، كوڭىل ايتۋ حاتتارىن جولداعان پرەزيدەنت اپپاراتىنا، ۇكىمەت مۇشەلەرىنە، دەپۋتتاتتارعا، وبلىس اكىمدەرىنە، رەكتورلارعا، اقپارات قۇرالدارىنىڭ باسشىلارىنا، باس ءمۇفتي باستاعان ءدىن قىزمەتكەرلەرىنە راقمەتىمدى ايتامىن. تىلەك-نيەتتەرىڭىز قۇدايدان قايتسىن!»، - دەپ جازدى ول.
ايتىسكەر اقىن مارقۇم ءاليحان جالعىز ۇلى بولعان سوڭ ونىڭ بويىنا ەر-ازاماتقا ءتان بارلىق قاسيەتتى ءسىڭىرىپ وسىرۋگە تىرىسقانىن ايتادى.
«ءوزىم قانداي دا ءبىر جاقسى ورتاعا بارسام ەرتىپ اپارىپ كورسەتىپ جۇرەتىنمىن. ەكەۋمىز قولىمىز بوس ۋاقىتتا اتقا ءمىنىپ، بالىق اۋلايتىنبىز. جازدى كۇندەرى تاۋعا شىعىپ، كولگە شومىلساق، قىستى كۇندەرى كونكي مەن شاڭعى تەبەتىنبىز. كىشكەنتاي كۇنىنەن قالاعان كىتاپتارىن ساتىپ اپەرىپ، ءبىلىمدى بولۋعا تاربيەلەدىك. قازاقتىڭ حالىق ەرتەگىلەرىنەن، بالالار ادەبيەتىنىڭ وزىق ۇلگىلەرىنەن، تانىمدىق ەنتسيكلوپەديالاردان ءوزىنىڭ جەكە كىتاپحاناسىن جاساقتادىق. قۇراننىڭ الىپپەسىن تانىتۋ ءۇشىن ەكى جىل «ازىرەت سۇلتان» مەشىتىنىڭ جازعى يماندىلىق كۋرستارىندا وقىتتىم. ناتيجەسى جامان بولعان جوق. جەتىنشى سىنىپقا دەيىن 48№ مەكتەپ-ليتسەيدە ءبىلىم الدى. جەتىنشى سىنىپتا 9№ «زەردە» دارىندى بالالار مەكتەبىنە قابىلداندى. سول مەكتەپتىڭ مىقتى ۇستازدارىنىڭ ارقاسىندا بويىنداعى عالىمدىق قابىلەتى اشىلدى. فيزيكا، ينفورماتيكا، روبوتوتەحنيكا سالالارى بويىنشا وتكەن قالالىق، رەسپۋبليكالىق، حالىقارالىق وليمپيادالار مەن عىلىمي جوبالاردىڭ جيىرمادان اسا سايىسىندا ولجا سالدى. جوعارى ماتەماتيكا مەن فيزيكانى جاقسى مەڭگەردى. ءتىپتى، ونىڭ جاساعان ونەرتاپقىشتىق جوبالارىن وتكەن جازدا «قازاقستان» ۇلتتىق ارناسى ءتۇسىرىپ، ەفيردەن كورسەتكەنىن ەندى عانا ءبىلىپ وتىرمىن. ماعان ول تۋرالى ءوزى ايتقان جوق. ماقتانعاندى ۇناتپايتىن»، - دەپ جازدى ايتىسكەر.
ونىڭ سوزىنشە، ۇلى نيكولا تەسلا سياقتى ينجەنەر-ونەرتاپقىش عالىم بولۋدى ارمانداعان ەكەن.
«الداعى اقپان ايىندا جيىرما ءۇش مەملەكەت قاتىساتىن حالىقارالىق «جاۋتىكوۆ» وليمپياداسىنىڭ وقۋ-جاتتىعۋ دايىندىعىنان تولىق وتكەن-تۇعىن. ەندى مەدال اكەلەدى دەپ كۇتىپ جۇرگەندە وسىنداي جاعدايعا دۋشار بولدىق»، - دەپ جازدى سەرىكزات دۇيسەنعازى.
