قىسقى ۋنيۆەرسيادانى قاي تەلەارنادان كورۋگە بولادى

None
استانا. قازاقپارات - ەرتەڭ، 12-قاڭتاردا جالاۋىن كوتەرەتىن قىسقى ۋنيۆەرسيادانى قاي تەلەارنا كورسەتەتىنى بەلگىلى بولدى، دەپ حابارلايدى قازاقپارات ءتىلشىسى.

بيىل وتىزىنشى مارتە وتەتىن ءدۇبىرلى دودانى تىكەلەي ەفيردە كورسەتۋ مىندەتىن «Qazsport» تەلەارناسى ءوز مىندەتىنە الىپ وتىر.

ايتا كەتسەك، ۋنيۆەرسيادا ا ق ش-تىڭ لەيك- پلەسيد قالاسىندا 12-22-قاڭتار ارالىعىندا وتەدى. الەمدىك دوداعا 50 ەلدەن 1443 اتلەت قاتىسادى دەپ جوسپارلانىپ وتىر. ستۋدەنتتەر سپورتتىڭ 12 تۇرىنەن 86 جۇلدە جيىنتىعىن ساراپقا سالادى.

اتالعان جارىستا ەلىمىزدىڭ نامىسىن 78 سپورتشى قورعايدى.

بۇعان دەيىنگى ۋنيۆەرسيادالاردا قازاقستاندىق ستۋدەنتتەر 2017 -جىلى جوعارى ناتيجە كورسەتتى. ەلىمىزدىڭ الماتى قالاسىندا وتكەن باسەكەدە ولار 11 التىن، 8 كۇمىس پەن 17 قولا ولجالادى. ناتيجەسىندە بارلىعى 36 مەدالمەن قازاقستان جالپى كوماندالىق ەسەپتە ەكىنشى ورىن الدى.

بيىلعى قىسقى ۋنيۆەرسيادانىڭ كورسەتىلىم كەستەسى «Qazsport» تەلەارناسىنىڭ الەۋمەتتىك جەلىلەرىنە كۇندەلىكتى جاريالانادى.

ەسكە سالساق، بۇدان بۇرىن قىسقى ۋنيۆەرسيادادا شورت-ترەك، كونكي سپورتى جانە مانەرلەپ سىرعاناۋدان ونەر كورسەتەتىن سپورتشىلار بەلگىلى بولدى.

سونداي-اق، اتالعان جارىسقا قاتىساتىن قازاقستان حوككەي قۇراماسى انىقتالدى.


سوڭعى جاڭالىقتار