جاس ءانشى ەرجان ماكسيم حالىقارالىق بايقاۋدىڭ باس جۇلدەسىن جەڭىپ الدى

None
استانا. قازاقپارات - قازاقستاندىق جاس ءانشى ەرجان ماكسيم ماكەدونيا استاناسى سكوپە قالاسىندا وتكەن WAF CONTEST حالىقارالىق بايقاۋىنىڭ باس جۇلدەسىن جەڭىپ الدى، دەپ حابارلايدى قازاقپارات ءتىلشىسى.

قازاق ۇلتتىق ونەر ۋنيۆەرسيتەتى مەكتەبىنىڭ ەسترادالىق ۆوكال بويىنشا 9-سىنىپ وقۋشىسى ەرجان ماكسيم سونىمەن قاتار جىل سايىنعى WAF AWARDS جۇلدەسىنە يە بولدى.

ۋنيۆەرسيتەتتەن تۇسكەن مالىمەتكە قاراعاندا، بۇل ەكى جارىستى دۇنيەجۇزىلىك فەستيۆالدار قاۋىمداستىعى وتكىزەدى. WAF وتكىزگەن ءار ءتۇرلى بايقاۋلاردىڭ بەلسەندى قاتىسۋشىلارى جىل قورىتىندىسىنا سايكەس ماراپاتتالادى.

بۇل ماراپاتتار دارىندى جاستاردىڭ تابىس-جەتىستىكتەرىن دارىپتەپ، ولاردىڭ شىعارماشىلىعىن قولداۋعا جانە ناسيحاتتاۋعا باعىتتالعان.

بيىلعى جىلى WAF CONTEST بايقاۋىندا ەۋروپا جانە ازيانىڭ 16 مەملەكەتىنەن، سونىڭ ىشىندە قازاقستاننان 32 قاتىسۋشى باق سىنادى.

ولاردىڭ اراسىنان ەرجان ماكسيم بايقاۋدىڭ گران-پري يەگەرى اتاندى. ول ءوزىنىڭ جەڭىسىن قازاقستانعا، سونداي-اق قازاق ۇلتتىق ونەر ۋنيۆەرسيتەتىنە ارنادى. بۇل ۋنيۆەرسيتەتتىڭ بيىل تويلاناتىن 25 جىلدىعىنا العاشقى تارتۋ بولدى.

اتالعان بايقاۋعا قازاقستاننان ەرجانمەن بىرگە اتىراۋلىق التىناي تولەگەن دە قاتىسىپ، ول WAF AWARDS جۇلدەسىنە قوسا ەكىنشى ورىندى ەنشىلەدى.

«قازىر ەرجان 15 جاستا. ونىڭ ورالدا باستالعان انشىلىك جولى وسىلايشا تابىستى جالعاسۋدا. ەرتەڭ استاناعا ۇشامىز»، - دەدى قازاقپارات تىلشىسىنە ەرجاننىڭ اناسى گۇلميرا الىبەك.

ەسكە سالا كەتەيىك، بۇدان بۇرىن ەرجان ماكسيمنىڭ «گولوس. دەتي» بايقاۋىنىڭ جەڭىمپازى اتانعانىن جازعان بولاتىنبىز.

ەرجاننىڭ كەڭىنەن تانىمال بولۋى ءدال وسى بايقاۋدان باستالعان ەدى.


سوڭعى جاڭالىقتار