يمانعالي تاسماعامبەتوۆتىڭ قاتىسۋىمەن ۇ ق ش ۇ- نىڭ بيىلعى العاشقى وتىرىسى ءوتتى

ماسكەۋ. قازاقپارات - سەيسەنبى كۇنى ۇجىمدىق قاۋىپسىزدىك تۋرالى شارت ۇيىمى تۇراقتى كەڭەسىنىڭ وتىرىسى بارىسىندا ۇيىمنىڭ جاڭا باس حاتشىسى يمانعالي تاسماعامبەتوۆ رەسمي تۇردە تانىستىرىلدى، دەپ حابارلايدى قازاقپارات ءتىلشىسى.

ۇ ق ش ۇ باسپا ءسوز حاتشىسى ۆلاديمير زاينەتدينوۆتىڭ ايتۋىنشا، ۇ ق ش ۇ ۇجىمدىق قاۋىپسىزدىك كەڭەسىنىڭ شەشىمىمەن ۇيىمنىڭ باس حاتشىسى قىزمەتىنە تاعايىندالعان يمانعالي تاسماعامبەتوۆتى قاۋىپسىزدىك كەڭەستەرى حاتشىلارى كوميتەتىنىڭ (ق ق ك ك) ءتوراعاسى، بەلارۋس رەسپۋبليكاسى قاۋىپسىزدىك كەڭەسىنىڭ مەملەكەتتىك حاتشىسى الەكساندر ۆولفوۆيچ تانىستىردى.

«وسى جوعارى لاۋازىمعا يمانعالي نۇرعالي ۇلى تاسماعامبەتوۆتىڭ كانديداتۋراسىن قازاقستان باسشىلىعى ۇسىندى جانە ۇ ق ش ۇ ۇجىمدىق قاۋىپسىزدىك كەڭەسىنىڭ 2022-جىلعى 23- قاراشاداعى شەشىمىمەن ماقۇلداندى. ول 2025-جىلدىڭ 31- جەلتوقسانىنا دەيىن ءۇش جىل قىزمەت ەتەدى»، - دەدى قاۋىپسىزدىك كەڭەسىنىڭ مەملەكەتتىك حاتشىسى الەكساندر ۆولفوۆيچ.

ول ي. تاسماعامبەتوۆتىڭ ءار جىلدارى قازاقستان رەسپۋبليكاسىندا ءتۇرلى مەملەكەتتىك قىزمەتتەر اتقارعانىن اتاپ ءوتتى.

تۇراقتى كەڭەس مۇشەلەرى مەن باس حاتشىلاردىڭ ورىنباسارلارى، بىرىككەن شتاب باستىعى جانە ۇ ق ش ۇ حاتشىلىعىنىڭ قۇرىلىمدىق بولىمشەلەرىنىڭ باسشىلارى الدىندا سويلەگەن سوزىندە ي. تاسماعامبەتوۆ ءوزىنىڭ ۇ ق ش ۇ باس حاتشىسى قىزمەتىنە تاعايىندالۋى - ول ءۇشىن ۇلكەن مارتەبە جانە ۇلكەن جاۋاپكەرشىلىك ەكەنىن ايتتى.

«ۇ ق ش ۇ- عا مۇشە مەملەكەتتەردىڭ باسشىلارىنا ۇيىمنىڭ جۇمىس قۇرىلىمىن باسقارۋعا سەنىم بىلدىرگەنى ءۇشىن العىسىمدى بىلدىرگىم كەلەدى. الەم ۇلكەن گەوساياسي سىناقتاردىڭ كۋاسى بولىپ وتىر، وتە كۇردەلى ساياسي، ەكونوميكالىق جانە باسقا دا پروبلەمالاردى شەشۋگە تۋرا كەلەدى. ۇقشۇ الدىندا ودان كەم ەمەس كۇردەلى مىندەتتەر تۇر. وسى سىن-قاتەرلەر مەن پروبلەمالاردىڭ بارلىعى ءبىزدىڭ ۇيىمنىڭ شەشۋشى رولىنە، ونىڭ بەدەلى مەن ايماقتىق قاۋىپسىزدىكتى قامتاماسىز ەتۋدىڭ ءتيىمدى تەتىگى بولۋ قابىلەتىنە اسەر ەتەدى»، - دەدى جاڭا باس حاتشى.

بۇعان دەيىن حابارلانعانداي يمانعالي تاسماعامبەتوۆ ۇجىمدىق قاۋىپسىزدىك تۋرالى شارت ۇيىمىنىڭ باس حاتشىسى لاۋازىمىنا تاعايىندالدى.