جاز مەزگىلىندە جامبىل وبلىسىنىڭ ورماندارىنا بارۋعا تىيىم سالىنباق

استانا. قازاقپارات - جامبىل وبلىسىندا جاز ايلارىندا ورمانعا بارۋعا تىيىم سالىنۋى مۇمكىن.

بۇل تۋرالى «اشىق» نقا پورتالىندا جاريالانعان ءوڭىر اكىمى نۇرجان نۇرجىگىتوۆتىڭ ءتيىستى قاۋلى- جوباسىندا جازىلعان، دەپ حابارلايدى قازاقپارات ءتىلشىسى.

«ورماندا ءورت قاۋپى جوعارى بولىپ تۇرعان كەزەڭدەردە (جىل سايىن 1-شىلدەدەن 20-قىركۇيەككە دەيىن) جەكە تۇلعالاردىڭ مەملەكەتتىك ورمان قورى اۋماعىندا بولۋىنا تىيىم سالىنسىن»، - دەلىنگەن قاۋلىدا.

قۇجاتقا قوسىمشا بەرىلگەن تۇسىندىرمەدە كورسەتىلگەندەي، مۇنداي شەشىم ورمان القابىندا ءورت وقيعالارىنىڭ الدىن الۋ ماقساتىندا قابىلدانىپ وتىر.

«وبلىسىمىزدىڭ مەملەكەتتىك ورمان قورى جەرىندە جوعارى ءورت قاۋپى كەزەڭى ءار جىلدىڭ 1-ماۋسىمىنان 20-قىركۇيەگىنە دەيىن بايقالادى. جامبىل گيدرومەتەورولوگيا ورتالىعىنىڭ مالىمەتى بويىنشا وبلىس اۋماعىندا جوعارىدا كورسەتىلگەن ايلاردا +30+40°c ءورت قاۋپى كەزەڭى بايقالادى. مەملەكەتتىك ورمان قورى جەرىندە جەكە تۇلعالاردىڭ كوپ بولۋى سالدارىنان ورمان القابىندا ءورت شىعۋ وقيعالارى دا كوبەيەدى. ورمان ءورتى بولعان جاعدايدا سەكسەۋىل، جۇزگىن جانە تاعى دا باسقا اعاشتار ورتەنىپ، جويىلادى. جاقىن ورنالاسقان ەلدى مەكەندەردى، جولداردى جانە ەگىس القاپتارىن قۇم باسىپ قالۋ ءقاۋپى تونەدى. سوندىقتان وسى جوعارىدا كورسەتىلگەن فاكتىلەردىڭ الدىن الۋ ماقساتىندا تىيىم سالۋ جۇمىستارىن جۇرگىزۋ قاجەت»، - دەپ كورسەتىلگەن تۇسىندىرمە جازبادا.

جامبىل وبلىسىنداعى مەملەكەتتىك ورمان قورىنىڭ جالپى كولەمى 4 ميلليون 425,3 مىڭ گەكتار. ونى قورعاۋ جۇمىستارىمەن 15 ورمان شارۋاشىلىعى مەملەكەتتىك مەكەمەسى اينالىسادى.