ۇلى بريتانيا سوڭعى ون جىلداعى ەڭ اۋىر تۇماۋ ماۋسىمىن باستان وتكەرىپ جاتىر

None
لوندون. قازاقپارات – ۇلى بريتانيادا كەيىنگى ون جىلدا تىركەلگەن ەڭ كۇردەلى تۇماۋ ماۋسىمى ءوتىپ جاتىر.

بۇل تۋرالى ەلدىڭ دەنساۋلىق ساقتاۋ جانە الەۋمەتتىك قامتاماسىز ەتۋ ماسەلەلەرى بويىنشا مەملەكەتتىك حاتشىسى ستيۆ باركلاي مالىمدەدى، دەپ حابارلايدى قازاقپاراتتىڭ مەنشىكتى ءتىلشىسى.

«تۇماۋ بيىلعى ماۋسىمدى ەرەكشە قيىنداتتى. كەيىنگى جىلداردا بولماعان تۇماۋ ماۋسىمىنا تاپ بولدىق. بىلتىر وسى ۋاقىتتا تۇماۋمەن اۋرۋحاناعا تۇسكەندەر سانى 50 ادام بولسا، بيىل 5100 دەن اسادى. تۇماۋ ەرتە ءارى تەز باستالىپ، قاراشادان جەلتوقسانعا دەيىن جەتى ەسە كوبەيدى»، - دەپ اتاپ ءوتتى ستيۆ باركلاي بريتان پارلامەنتىندە سويلەگەن كەزىندە.

ونىڭ ايتۋىنشا، تۇماۋ ەپيدەمياسى كوروناۆيرۋس پەن ا توپتى سكارلاتينا، سترەپتوكوكك سىندى باسقا دا ينفەكتسيالارىمەن قاتار ءجۇرىپ جاتىر.

«تۇماۋ ماسەلەسى كوۆيدتىڭ ورنىن باستى. 9 مىڭنان اسا ادام كوروناۆيرۋس جۇقتىرىپ، اۋرۋحانادا جاتىر. ال ا توبىنداعى سكارلاتينا مەن سترەپتوكوككتىڭ كوبەيۋى شۇعىل جاردەم قىزمەتىنە قوسىمشا كۇش ءتۇسىردى»، - دەپ اتاپ ءوتتى بريتاندىق دەنساۋلىق ساقتاۋ مينيسترلىگىنىڭ باسشىسى.

بۇل جاعدايدى ەڭبەكاقىنى كوتەرىپ، ەڭبەك جاعدايىن جاقسارتۋدى تالاپ ەتكەن مەديتسينا قىزمەتكەرلەرىنىڭ ەرەۋىلدەرى ءتىپتى قيىنداتىپ جىبەردى.

ستيۆ باركلايدىڭ مەديتسينا قىزمەتكەرلەرىنىڭ مۇددەسىن قورعايتىن كاسىپوداق وكىلدەرىمەن كەلىسسوزى دۇيسەنبى كۇنى ءساتسىز بولدى.

ەندى انگليا مەن ۋەلس جەدەل جاردەم قىزمەتكەرلەرى 11 جانە 23-قاڭتار كۇندەرى، ال ولاردىڭ سولتۇستىك يرلاندياداعى ارىپتەستەرى 26-قاڭتاردا ەرەۋىلگە شىعادى.

ال انگليادا مەدبيكەلەر 18-19-قاڭتاردا پيكەت ۇيىمداستىرادى. شوتلانديالىق مەديكتەر دە جاقىن ارادا ەرەۋىل كۇنىن بەلگىلەيدى.


سوڭعى جاڭالىقتار