قوعامدىق ورىندا بالاعات ءسوز ايتۋ فاكتىسىن قالاي دالەلدەۋگە بولادى

استانا. قازاقپارات – ق ر ىشكى ىستەر مينيسترلىگى قوعامدىق ورىندا بالاعات ءسوز ايتۋ فاكتىسىن قالاي ايعاقتاۋعا بولاتىنىن ءتۇسىندىردى، دەپ حابارلايدى قازاقپارات.

قوعامدىق ورىندا بالاعات ءسوز ايتۋ جانە باسقا دا ۇساق بۇزاقىلىق ءۇشىن 69 مىڭ تەڭگە كولەمىندە ايىپپۇل نەمەسە 30 تاۋلىككە دەيىن قاماۋعا الۋ جازاسى بەكىتىلگەنىن جازعان بولاتىنبىز.

مينيسترلىكتىڭ تۇسىندىرۋىنشە، قوعامدىق ورىنعا كولىك، كوشە، دۇكەندەردى جاتقىزۋعا بولادى. بالاعات ءسوز ايتىلعانىن اۋديو جانە ۆيدەوجازبا ارقىلى، سونداي-اق كۋاگەرلەردىڭ كومەگىمەن دالەلدەۋگە بولادى.

«ەگەر ەشكىم بالاعاتتاۋ فاكتىسىن راستاي الماسا دا، ءىستىڭ ءمان-جايىن انىقتاۋ ءۇشىن پوليتسياعا جۇگىنۋگە بولادى»، - دەپ تولىقتىردى ۆەدومستۆو.

ۇساق بۇزاقىلىق فاكتىسى بويىنشا تۇپكىلىكتى شەشىمدى سوت قابىلدايدى.

ءتيىستى وزگەرىستەر قىلمىستىق جانە قىلمىستىق ءىس جۇرگىزۋ كودەكستەرىنىڭ، سونداي-اق اكىمشىلىك قۇقىق بۇزۋشىلىق تۋرالى كودەكستىڭ ءبىرقاتار باپتارىنا ەنگىزىلەدى.

ايتا كەتەيىك، اكىمشىلىك قۇقىقبۇزۋشىلىقتار كودەكسىنىڭ جاڭا نۇسقاسىندا «ۇساق بۇزاقىلىق» ءۇشىن ايىپپۇل 20 ا ە ك (69000 تەڭگە) قۇرايدى، قاماۋعا الۋ 5 تەن 30 تاۋلىككە دەيىن ۇزارادى.

بيىل 3-قاڭتاردا ەل پرەزيدەنتى قاسىم-جومارت توقايەۆ «ق ر قىلمىستىق جانە قىلمىستىق ءىس جۇرگىزۋ كودەكستەرىنە ەكولوگيالىق قۇقىقبۇزۋشىلىقتار مەن ۆانداليزم كورىنىستەرى ءۇشىن جاۋاپكەرشىلىكتى كۇشەيتۋ ماسەلەلەرى بويىنشا تولىقتىرۋلار ەنگىزۋ تۋرالى» جانە «ق ر اكىمشىلىك قۇقىق بۇزۋشىلىق تۋرالى كودەكسىنە ەكولوگيالىق قۇقىقبۇزۋشىلىقتار مەن ۆانداليزم كورىنىستەرى ءۇشىن جاۋاپكەرشىلىكتى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.