ازاپتاۋ بويىنشا سوتتالعاندارعا جازا كۇشەيتىلمەك

استانا. قازاقپارات - شارتتى تۇردە مەرزىمىنەن بۇرىن بوساتۋ ازاپتاۋ ىستەرى بويىنشا سوتتالعاندارعا اسەر ەتپەيدى.

مۇنداي وزگەرىس «اشىق» ن ق ا پورتالىندا جاريالانعان «ق ر كەيبىر زاڭنامالىق اكتىلەرىنە قىلمىستىق، قىلمىستىق- پروتسەستىك جانە قىلمىستىق- اتقارۋ كودەكستەرىن وڭتايلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭ جوباسىندا جازىلعان، دەپ حابارلايدى قازاقپارات ءتىلشىسى.

اتاپ ايتقاندا، ۇسىنىلىپ وتىرعان وزگەرىستەردىڭ ىشىندە شارتتى تۇردە مەرزىمىنەن بۇرىن بوساتۋ قولدانىلمايتىن ساناتتار ءتىزىمىن تولىقتىرىلعان.

«قىلمىستىق كودەكستىڭ 73-بابىنا (جازانىڭ وتەلمەگەن بولىگىن نەعۇرلىم جەڭىل جازا تۇرىمەن اۋىستىرۋ نەمەسە تاعايىندالعان جازا مەرزىمىن قىسقارتۋ) سايكەس باس بوستاندىعىنان ايىرۋ تۇرىندەگى جازاسى باس بوستاندىعىن شەكتەۋمەن اۋستىرىلعان، بۇرىن ءومىر بويىنا باس بوستاندىعىنان ايىرۋ جازاسىن وتەۋدەن شارتتى تۇردە بوساتىلعاندار، ءومىر بويىنا باس بوستاندىعىنان ايىرۋ جازاسىن وتەۋ كەزەڭىندە جاڭا اۋىر نەمەسە اسا اۋىر قىلمىس جاساعاندار مەن ازاپتاۋ ءۇشىن سوتتالعاندارعا شارتتى تۇردە مەرزىمىنەن بۇرىن بوساتۋ شاراسى اسەر ەتپەيدى»، - دەلىنگەن قۇجاتتا.

توقتالا كەتسەك، قازىرگى قولدانىستاعى زاڭدا مۇنداي تالاپتار جوق. سونىمەن قاتار، وزگەرىستەردىڭ ءبىرى - شارتتى تۇردە مەرزىمىنەن بۇرىن بوساپ شىققاندارعا پروباتسيالىق باقىلاۋ تاعايىنداۋ. ياعني، سوتتالعاندار ءتيىستى شەشىممەن بوستاندىققا شىعاتىن بولسا، وندا ولارعا جازاسىنىڭ وتەلمەي قالعان مەرزىمى ءۇشىن پروباتسيالىق باقىلاۋ بەكىتىلەدى. ماسەلەن، ءومىر بويىنا باس بوستاندىعىنان ايىرۋ جازاسىنا كەسىلىپ، شارتتى تۇردە مەرزىمىنەن بۇرىن بوساتىلعان ازاماتقا پروباتسيالىق باقىلاۋ 10 جىل مەرزىمگە بەلگىلەنەدى.