بيىل قۇرمانعازى تۋرالى مۋلتفيلم جارىق كورەدى

استانا. قازاقپارات - بيىل شىلدە ايىندا داۋلەسكەر كۇيشى، كومپوزيتور قۇرمانعازى ساعىرباي ۇلى تۋرالى مۋلتفيلم جارىق كورمەك.

اتالعان تۋىندىنى دايىنداپ جاتقان ماماندار اراسىندا قازىرگى تاڭدا جاستارعا انيمە ستيلىندەگى سۋرەتتەرىمەن تانىمال ل. گۋميليەۆ اتىنداعى ە ۇ ۋ- ءنىڭ ستۋدەنتى ارۋجان ۇناربەكوۆا دا بار. وسى ورايدا، قازاقپارات ءتىلشىسى سۋرەتشى قىزبەن اڭگىمەلەسىپ، الداعى ۋاقىتتا جارىق كورەتىن تىڭ تۋىندى تۋرالى سۇراپ كورگەن ەدى.

ارۋجان ۇناربەكوۆا ەۋرازيا ۇلتتىق ۋنيۆەرسيتەتىندەگى ساۋلەت- قۇرىلىس فاكۋلتەتىنىڭ 5 كۋرسىندا وقيدى. ول وقۋدان بوس ۋاقىتىندا ءتۇرلى كەيىپكەرلەردىڭ سۋرەتىن انيمە ستيلىندە سالۋمەن اينالىسادى. ونىڭ ەل پرەزيدەنتىنىڭ بەينەسىن اتالعان ستيلدە سالۋى، سونداي- اق قازاق حالقىنىڭ كورنەكتى تاريحي تۇلعالارىن سۋرەتتەگەن جۇمىستارى جاستار اراسىندا اسا تانىمال. بۇگىندە ول سۋرەت سالۋمەن قاتار، مۋلتفيلم جاساۋ ىسىنە دە دەن قويعان.

«قازىر «تاسقىن» انيماتسيالىقق ستۋدياسىندا جۇمىس ىستەيمىن. ءبىزدىڭ جوبامىزدى مۋلتسەريال دەپ اتاسا دا بولادى. جالپى، مۋلتسەريالىمىز قازاق حالقىنىڭ اتاقتى كۇيشىلەرى، ولاردىڭ ءومىربايانى جانە شىعارماشىلىق جولى تۋرالى باياندايدى. ءار ماۋسىمدا جاڭا كۇيشىلەر تۋرالى ايتىلادى. تۋىندىنىڭ نەگىزگى ەرەكشەلىكتەرى - ەپيزودتىڭ ىشىندەگى كورسەتىلەتىن شاعىن اڭگىمەلەردىڭ بارلىعى شىنايى كۇيلەردىڭ تاريحىنا نەگىزدەلگەن» ، - دەدى ارۋجان.

قۇرمانعازى تۋرالى مۋلتفيلم 13 سەريادان تۇرادى. ارۋجان ۇناربەكوۆانىڭ سوزىنشە، تۋىندىداعى باستى كەيىپكەردىڭ وبرازى بىرنەشە ايعا سوزىلعان ىرىكتەۋدەن كەيىن تاڭدالعان.

«مۋلتفيلمدەگى كەيىپكەرلەردىڭ قوزعالىس انيماتسياسى اسا قيىن بولماعاندىقتان، ءبىز ولاردىڭ سۋرەتىن دەتالدى كورسەتىپ، رەاليزيم ءتاسىلىن قولدانىپ جاتىرمىز. قۇرمانعازىنىڭ تۋىندىداعى وبرازى بىرنەشە اي بويى تاڭدالدى. باستى كەيىپكەرلەردى جاساعان سۋرەتشىلەر قۇرمانعازىنىڭ رەفەرەنستەرىن جيناپ، ۇلگىلەردىڭ ىشىنەن ەڭ قولايلىسىن تاڭداپ الدى. ەپيزودتاردىڭ ۇزاقتىعى ءارتۇرلى. ماسەلەن، ءبىر ەپيزود 20 مينۋتتان اسسا، سوڭعىلارى 15-10 مينۋتپەن شەكتەلەدى. 2023 -جىلدىڭ شىلدەسىنە دەيىن مۋلتفيلمنىڭ ءبىرىنشى ماۋسىمى بويىنشا جۇمىستار اياقتالىپ، كورەرمەنگە جول تارتادى»، - دەپ توقتالدى جاس سۋرەتشى.

سونىمەن قوسا، ارۋجان ۇناربەكوۆا وزگە دە جوبالار بويىنشا جۇمىس جاساپ جاتقانىن اتاپ ءوتتى.

«كوپتەگەن قىزىقتى جوبالاردى شىعارۋ جوسپارلانۋدا. قىسقامەتراجدى فيلمدەر مەن «دالا شارقاۋى» مۋلتسەريالىنىڭ ەكىنشى سەزونىنان باسقا، تولىقمەتراجدى كوركەمفيلمدەردىڭ سيۋجەتتەرى دايىندالۋدا»، - دەپ جوسپارلارىمەن ءبولىستى ول.

ەسكە سالا كەتەيىك، بۇعان دەيىن قازاقپارات رەداكسياسى ارۋجاننىڭ مەملەكەت باسشىسى قاسىم- جومارت توقايەۆتىڭ بەينەسىن انيمە ستيلىندە سالعان سۋرەتتەرى تۋرالى جازعان ەدى.

اۆتور

ءاليحان اسقار