الماتىلىق كالليگراف بويجەتكەن الەمدىك برەندتەردىڭ تاپسىرىسىن ورىنداپ ءجۇر

None
None
استانا. قازاقپارات - الماتىلىق بويجەتكەن دانا دۇيسەمباي كالليگرافيا ونەرىن ءوز بەتىمەن ۇيرەنگەن.

ايتۋىنشا، اتالعان ونەر ءتۇرى ەلىمىزدە ەندى دامىپ كەلەدى. جاس كالليگرافتىڭ جۇمىسىنا قىزىعۋشىلىق تانىتىپ، تاپسىرىس بەرگەن الەمدىك برەندتەردىڭ قاتارىندا Louis Vuitton, Dior، Jo Malone, Yves Saint-Laurent جانە تاعى باسقا بار. وسى ورايدا قازاقپارات ءتىلشىسى جاس ونەر يەسىنىڭ شىعارماشىلىق جۇمىستارىمەن جاقىرىناق تانىسقان ەدى.

22 جاسار دانا دۇيسەمباي الماتى وبلىسى بورالداي كەنتىنىڭ تۋماسى. قازىر الماتىدا م. تىنىشبايەۆ اتىنداعى قازاق كولىك جانە كوممۋنيكاتسيالار اكادەمياسىندا تەمىر جول سالاسى ماماندىعىن مەڭگەرىپ جاتىر. ول وقۋدان تىس كەزدە كالليگرافيا ونەرىمەن اينالىسادى.

اتالعان ونەر تۇرىنە باسىندا قىزىعۋشىلىق تانىتىپ، حوببي رەتىندە باستاپ، قازىر نەگىزگى كاسىبىنە اينالعان دەۋگە بولادى.

«كالليگرافيا - قولمەن ادەمىلەپ جازۋ ونەرى. كوپ ادامدار ونى كادىمگى قولمەن جازۋمەن (پوچەرك) بايلانىستىرىپ نەمەسە شاتاستىرىپ جاتادى. ول ەكىتۇرلى نارسە. كالليگرافيا جازۋىن بەينەلەۋ ونەرىنىڭ ەرەكشە جانرى دەۋگە بولادى. كالليگراف ماماندىعىن جوعارى وقۋ ورىندارىندا نەمەسە كوللەدجدە ارنايى وقىتپايدى. دەگەنمەن ونەر ورتالىقتارى مەن ستۋديالاردا وقىپ مەڭگەرۋ مۇمكىندىگى بار. سونىمەن قاتار ءوز بەتىمەن نەمەسە كۋرس وقىپ ۇيرەنۋگە بولادى. بۇل ماماندىقتىڭ تاعى ءبىر ەرەكشەلىگى تۇراقتى جۇمىس بولماۋى مۇمكىن. ياعني تاپسىرىس بۇگىن بار، ەرتەڭ جوق»، - دەدى دانا دۇيسەمباي.

ايتۋىنشا، بويجەتكەن كالليگرافيا سالاسىنا كۇتپەگەن جەردەن كەلگەن.

«1 كۋرس وقىپ جۇرگەندە YouTube تەن كالليگرافيا ونەرى تۋرالى ۆيدەو كورىپ قالدىم. بەينەجازبانى كورگەننەن سوڭ قىزىعۋشىلىعىم ارتىپ، ينتەرنەتتەن كالليگرافيا تۋرالى تەرەڭىرەك بىلۋگە كىرىستىم. سول سياقتى كالليگرافتاردىڭ جۇمىسىمەن تانىسىپ، ءوز بەتىمشە جازىپ ۇيرەنە باستادىم. ناتيجەسىندە قىزىعۋشىلىق ارتا ءتۇسىپ، كەيىن ارنايى كۋرس وقىدىم. ال قازىرگى جازىپ جۇرگەن ستيل ياعني پەرومەن جازۋدى كەيىنىرەك مەڭگەردىم. ەڭ العاشقى تاپسىرىس 2019 -جىلى كوفەحانادان ءتۇستى، ولار 100 ستاكاننىڭ سىرتىنا كالليگرافيا ستيلىندە جازۋ جازىپ بەرۋىمدى سۇرادى. سونداي- اق، ءدامحانالار مەن كوفەحانالاردان ءمازىر تاقتاسىنا جازۋ تاپسىرىستارى تۇسە باستادى. بارلىعى دا قولمەن جازىلادى»، - دەيدى ول.

ۋاقىت وتە كەلە جاس كالليگرافتىڭ ەڭبەگى ەلەنىپ تاپسىرىس بەرۋشىلەر سانى كوبەيە باستاعان.

«كەيىن ءتۇرلى قۇتتىقتاۋلار، كىتاپتىڭ العى بەتىن كالليگرافيامەن جازۋعا تاپسىرىستار بولدى. وسىلايشا كۇن ساناپ تاجىريبەم مەن كەلىپ تۇسەتىن تاپسىرىستار ارتا باستادى. مىسالى، بىلتىر Dior برەندىنىڭ الماتىداعى باسقارۋشى ديرەكتورى جەكە حابارلاسىپ، ولارمەن 3 كۇن بويى جۇمىس ىستەدىم. بيىل ناۋرىزدا 4 الەمدىك برەندتەن تاپسىرىس الدىم، ونىڭ ىشىندە Yves Saint-Laurent, Valentino, Armani جانە Lancome بار. ودان بولەك، ەلىمىزدەگى Louis Vuitton برەندىمەن دە جۇمىس ىستەدىم. ياعني ولارعا مەرەكە، تۋعان كۇن باسقا دا ايتۋلى داتالار بويىنشا قۇتتىقتاۋ حاتتارىن (وتكرىتكا) جازدىم. كليەنتتىڭ تاڭداۋىنا قاراي ءۇش تىلدە (قازاق، ورىس، اعىلشىن) جازىپ بەرەمىن»، - دەيدى مامان.

ونىڭ ايتۋىنشا، قازاقستاندا كالليگرافيا ونەرى ەندى عانا دامىپ كەلەدى جانە ماماندار كوپ ەمەس. ايتار بولساق، الماتىدا بار- جوعى 4-5 عانا كالليگراف بار ەكەن، ال ەلىمىز بويىنشا ونشاقتى مامان وسى كاسىپپەن اينالىسىپ ءجۇر.

«كالليگراف دەگەن كىم؟ ول نەمەن اينالىسادى دەپ سۇراپ جاتاتىندار بار. مەنىڭ ويىمشا، بۇل ماماندىقتى يگەرەتىندەردىڭ ازشىلىقتى قۇراۋى كاسىپتى مەڭگەرۋمەن بايلانىستى. سەبەبى كالليگرافيا ونەرى توزىمدىلىك پەن ۇزبەي ۇيرەنۋدى تالاپ ەتەدى. سوندىقتان كوبىسىنىڭ شىدامى جەتە بەرمەيتىن سەكىلدى. كالليگرافيا - شەت مەملەكەتتەرگە جاقسى دامىعان. جۇمىستىڭ باعاسىنا قاتىستى ءسوز قوزعاساق، بۇل جەردە بىرنەشە جايت قامتىلادى. باعا قويۋدا الدىمەن تاپسىرىستىڭ كولەمى، وعان جۇمسالاتىن ۋاقىت جانە قانداي قۇرال قولدانىلاتىنى ەسكەرىلەدى. مىسالى، تۋعان كۇنمەن قۇتتىقتاۋ پاراعىن (وتكرىتكا) جازۋ شامامەن 1500-2000 تەڭگەگە شىعادى. جۇمىس ءساتتى شىعۋى ءۇشىن ۋاقىت پەن شابىت ءرول وينايدى. سەبەبى كالليگرافيا شىعارماشىلىق جۇمىس، ياعني قولونەر»، - دەدى الماتىلىق بويجەتكەن.

بۇگىندە دانا تاجىريبەسىن وزگەلەرمەن ءبولىسىپ ءجۇر. كالليگرافيا ونەرىن ۇيرەنۋگە نيەتتىلەر بارشىلىق ەكەن.

«قازىر شاكىرتتەرىم بار، ۇيرەتىپ جاتىرمىن. بولاشاقتا جەكە ستۋديا اشۋ جوسپارىم بار. تاپسىرىستى ستۋديادا قابىلداپ جانە توپتىق كۋرس ۇيىمداستىرسام دەيمىن. كالليگرافيانى مەڭگەرگىسى كەلەتىن جاندارعا ايتارىم، الدىمەن قانداي ماقساتتا ۇيرەنگىڭىز كەلەتىن ناقتىلاپ الىڭىز. اتالعان ونەردى ۇيرەنۋگە تاباندىلىق جانە ۇزدىكسىز تاجىريبە قاجەت. ءبىراز ۋاقىت اينالىسپاساڭىز قول شىعىپ كەتەدى. باستاعان ءىستى تاستاماعان ءجون»، - دەپ ءتۇسىندىردى د. دۇيسەمباي.

سوڭعى جاڭالىقتار