التاي كولگىنوۆ: باستى مىندەتتىڭ ءبىرى - ستۋدەنتتەردى جاتاقحانامەن قامتاماسىز ەتۋ

استانا. قازاقپارات - جاتاقحانا قۇرىلىسى بويىنشا مەملەكەتتىك-جەكەمەنشىك ارىپتەستىك تەتىگىن تەز ارادا جەتىلدىرۋ كەرەك.

بۇل تۋرالى ق ر پرەمەر-ءمينيسترىنىڭ ورىنباسارى التاي كولگىنوۆ ايتتى، دەپ حابارلايدى قازاقپارات ءتىلشىسى.

«كەلەسى ماڭىزدى ماسەلە - جوعارى ءبىلىم سالاسىن دامىتۋ جۇمىستارىن جالعاستىرۋ. مەملەكەت باسشىسى وتاندىق جوعارى ءبىلىمنىڭ باسەكەگە قابىلەتتىلىگىن ارتتىرۋدى، جاستاردىڭ ساپالى ءبىلىم الۋىنا قاجەتتى جاعدايلار جاساۋدى تاپسىردى. باستى مىندەتتەردىڭ ءبىرى - ستۋدەنتتەردى جاتاقحانامەن قامتاماسىز ەتۋ ماسەلەسىن شەشۋ»، - دەدى ۆيتسە-پرەمەر ق ر عىلىم جانە جوعارى ءبىلىم مينيسترلىگىنىڭ كەڭەيتىلگەن القا ماجىلىسىندە.

ونىڭ اتاپ وتۋىنشە، بۇل ماسەلە ۇكىمەتتە بىرنەشە رەت قارالىپ، ناقتى شەشىمدەر پىسىقتالعان.

«ونى ءبىز ورىنداۋىمىز قاجەت. مينيسترلىك مۇددەلى مەملەكەتتىك ورگاندارمەن بىرگە ۋنيۆەرسيتەتتەر مەن قۇرىلىس كومپانيالارى اراسىندا جاتاقحانا قۇرىلىسى بويىنشا مەملەكەتتىك-جەكەمەنشىك ارىپتەستىك تەتىگىن تەز ارادا جەتىلدىرۋى كەرەك. ستۋدەنتتەردى جاتاقحانا ورىندارىمەن قامتاماسىز ەتۋ ماسەلەسىن جۇيەلى شەشۋ ماقساتىندا ۋنيۆەرسيتەت رەكتورلارى اكىمدىكتەرمەن، ينۆەستورلارمەن بىرگە بەلسەندى جۇمىس جۇرگىزۋى ءتيىس»، - دەدى التاي كولگىنوۆ.