كامەلەت جاسىنا تولماعاندار قانداي جۇمىس جاساي الادى؟

None
استانا. قازاقپارات - قالتاڭدا ارتىق تيىنىڭ بولسا ءوزىڭدى الدەقايدا سەنىمدى سەزىنەسىڭ. بۇل سوزدەر بۇگىن دە مەكتەپ وقۋشىلارى اراسىندا تانىمالدىلىققا يە.

جۇرەك جالعاۋعا، ءجۇرىپ تۇرۋعا، ودان قالسا كەرەك-جاراعىڭدى الۋعا اقشا جەتپەي قالاتىن كەزدەر بولىپ تۇرادى. بالانى تولىعىمەن قامتاماسىز - ەتۋ اتا-انانىڭ مىندەتى. دەگەنمەن دە، ءاربىرىمىز ولارعا ارتىق سالماق سالماۋدىڭ جولىن ىزدەيمىز.

قازىرگى تاڭدا جاسوسپىرىمدەردىڭ داياشى نە ساتۋشى بوپ جۇمىس ىستەپ جۇرگەنىن ءجيى كورەمىز. كەي جاعدايلاردا قيىندىققا تاپ بولىپ، ارتى داۋعا ۇلاسىپ جاتاتىن كەزدەر دە از ەمەس. بۇنداي وقىلىقتاردىڭ الدىن قالاي الۋعا بولادى؟ زاڭ نە دەيدى؟

بالالاردىڭ جۇمىسىنا بايلانىستى قويىلاتىن شارتتارعا توقتالىپ وتسەم، 14 جاسقا تولماعان بالالار دا ەڭبەككە قاتىناسا الادى. ەڭبەك زاڭناماسىنا سايكەس، ولارعا ەڭبەك كەلىسىم-شارتىمەن سيركتە، تەاترلار مەن كونسەرتتەردە ونەر كورسەتۋگە نەمەسە كينوعا تۇسۋگە بولادى (ق ر ەڭبەك كودەكسىنىڭ 31-بابى). ەڭ باستىسى - بالانىڭ دەنساۋلىعى مەن پسيحولوگياسىنا زيان كەلمەۋى ءتيىس. 14 جاستان 16 جاسقا دەيىنگى جاسوسپىرىمدەر - اپتاسىنا 24 ساعاتتان اسپايتىن ۋاقىت، ال 16 دان 18 جاسقا دەيىنگىلەر 36 ساعاتتان اسپايتىن مەرزىمدە جۇمىس ىستەۋى كەرەك (ق ر ەڭبەك كودەكسىنىڭ 69-بابى). 16 جاستاعى جەتكىنشەكتەر جارتى ايلىق جالاقى السا، كامەلەتكە تولعاندار تولىعىمەن جالاقى الۋعا قۇقىلى.

بالانىڭ قادامىن قولداۋ نەمەسە قارسى بولۋ - اتا-انا تاڭداۋى. بالاڭىزدىڭ جاقسى نيەتى ارتىنشا پسيحولوگيالىق سوققىعا اينالماس ءۇشىن، بۇعان سابىرمەن جانە بايسالدىلىقپەن قاراۋعا تىرىسىڭىز. بولار بالانىڭ بەتىن قاققان دا دۇرىس ەمەس. ەڭ اۋەلى، ونىڭ قىزىعۋشىلىعىن انىقتاپ، قابىلەتىنە قاراي بىرىگىپ سالا تاڭداڭىز. ەسەسىنە، جەتكىنشەك اقشانىڭ ماڭداي تەرمەن كەلەتىنىن سەزىپ قانا قويماي، قارجىلىق ساۋاتتىلىققا دا ۇيرەنەدى.

قازىرگى تاڭدا تابىس تابۋ جولدارىنىڭ ءتۇرى سان الۋان. ماسەلەن، كەيبىر ادامدار ۇيدە وتىرىپ نەشە ءتۇرلى تارگەت، ونلاين- دۇكەن اشىپ، SMM كۋرستارىن ساتىپ- اق ميلليوننىڭ اينالاسىندا اقشا تاۋىپ ءجۇر. بۇل ءدامحانالار مەن رەستورانداردا داياشى بولىپ ۋاقىتىڭنىڭ كوپ بولىگىن جوعالتقانعا قاراعاندا الدەقايدا قولايلى.

«جەردە جاتقان باتپانقۇيرىق» العاشقىدا كۇدىك تۋدىرعانىمەن، بارا-بارا ەل اراسىندا كەڭ ءورىس الا باستادى. اسىرەسە ۇيدە وتىرعان انالارعا، ستۋدەنتتەرگە، جالپى جۇمىسى جوق ادامدارعا تيىمدىلىگى جوعارى. دەگەنمەن دە، قازىر instagram, telegram ارقىلى كۋرس ساتۋشىلار سانى بۇرىنعىعا قاراعاندا ەداۋىر ارتتى. سول سەبەپتى، الاياقتاردىڭ قۇرىعىنا ءتۇسىپ قالماۋ ءۇشىن ساقتانىپ ءجۇرىڭىز دەگىم كەلەدى.

وقۋشىلار اراسىندا وسى سىندى كۋرستاردى الىپ-ساتۋ جوق ەمەس، بار. اسىرەسە، 16 عا تولماعاندار ۇيدە وتىرىپ ونلاين جۇمىس جاساۋدى قۇپ كورەدى. وقۋى مەن جۇمىسىن قاتار الىپ جۇرە الاتىن جەتكىنشەكتەر ءۇشىن بۇل كەرەمەت مۇمكىندىك. الايدا، ءار سالانىڭ ءوزىنىڭ بورىلەرى بار ەكەنىن ەسكەرىپ جۇرگەن دە ءجون. باسەكەنىڭ كوكەسىن كورگەندە جانشىلىپ قالمايتىنىڭىزعا سەنىمدى بولىڭىز!

نازارلارىڭىزعا وقۋشىلار مەن ستۋدەنتتەر اتقارا الاتىن قىزمەت تۇرلەرىن ۇسىنامىن: بلوگەرلىك، پوشتاعا كومەكشى، پروموۋتەر، اۋدارماشى، سۋرەت نەمەسە ۆيدەو وڭدەۋشى، قولونەرشىلىك، جارنامالاردى ءىلۋشى، رەپەتيتور، تاپسىرىسقا ەسسە نەمەسە ماقالا جازۋ، ەرىكتى، مودەل، ءارتىس نە بولماسا جەكە كاسىپ يەسى. ايتا كەتەرلىك جايت، قازىرگى تاڭدا ءتۇرلى شەبەرلىك ساعاتتارىنا قاتىسىپ، سەرتيفيكاتتار الۋ ارقىلى جەكە كاسىپ يەسى اتانۋعا بولادى.

قىزمەت كورسەتۋدىڭ بۇل سالاسى جاس تالعامايدى. ونداي جاس كاسىپكەرلەردى مەكتەپتەن دە كەزدەستىرۋگە بولادى. جوعارى سىنىپ وقۋشىلارى ۆيزاجيست، بروۆيست، مانيكيۋر- پەديكيۋر جاساۋ سىندى وزدەرىن قىزىقتىرعان ماماندىقتاردى وقىپ، كۇنىنە ورتا ەسەپپەن 2000-4000 تەڭگە تابىس تاۋىپ ءجۇر. ولاردىڭ ايتۋىنشا، قوسالقى جۇمىس ساباق وقۋعا ەش كەدەرگى كەلتىرمەيدى. تاپسىرىس بەرۋشىمەن كەلىسىپ، وزىنە ىڭعايلى كەز كەلگەن بوس ۋاقىتتى تاڭداي الادى. بۇل ولاردىڭ شىعارماشىلىق دامۋىنا، سونداي- اق جان- جاقتى بولۋىنا كومەكتەسەدى ەكەن. جاس كاسىپكەرلەرگە ساتتىلىك سەرىكتەرى بولسىن دەپ تىلەيمىز!

وسىلايشا، مەكتەپ وقۋىشلارىنىڭ جۇمىس جاساۋعا مۇمكىندىكتەرى الدەقايدا جوعارى ەكەندىگىنە كوز جەتكىزدىك. الايدا، سولاي ەكەن دەپ، اتا-اناڭنىڭ رۇقساتىنسىز جۇمىس جاساۋ - قاتەلىك. قانداي ءىستى باستاماساڭ دا، ەڭ اۋەلى سولارمەن اقىل الماسقانىڭ ابزال.

جوعارىدا ايتىلعان ويلاردى قورىتىندىلاي كەلە، مەملەكەت تاراپىنان كامەلەتكە تولماعاندارعا ارناپ جۇمىس ورىندارى اشىلسا جانە ولاردىڭ جۇمىسقا ورنالاسۋىنا جاعداي جاسالسا دەگەن ۇسىنىس تاستاعىم كەلەدى. جاسوسپىرىمدەردىڭ بويىنداعى قابىلەتتەرىن دامىتىپ، ولاردىڭ تولىق اشىلۋىنا جانە دۇرىس جولدى تاڭداۋىنا بارىنشا كومەك كورسەتۋ كەرەك.

سوڭعى جاڭالىقتار