شىمكەنتتە جوعالىپ كەتكەن وقۋشى قىز تابىلدى، ءبىراق ۇيىنە قايتۋدان باس تارتقان

ايتا كەتەيىك، 30-جەلتوقساندا اباي ا پ ب-عا جەرگىلىكتى تۇرعىن كامەلەتتىك جاسقا تولماعان قىزى جوعالعانى تۋرالى شاعىمدانعان بولاتىن. اناسىنىڭ ايتۋىنشا، قىز تۋىستارىمەن جانجالداسىپ ۇيىنەن شىعىپ كەتكەن. بۇعان دەيىن جاس ءوسپىرىم 3 رەت ۇيىنەن كەتىپ قالىپ، پوليتسەيلەر ونى اناسىنا قايتا تاپسىرعان.

«شىمكەنت قالاسى پ د-نىڭ جەدەل ۋاكىلدەرى، ۋچاسكەلىك ينسپەكتورلار مەن ەرىكتىلەر جوعالعان قىزدى 7 كۇن بويى توقتاۋسىز ىزدەدى. بالانى ىزدەۋ جۇمىستارى پوليتسيا دەپارتامەنتى باسشىلىعىنىڭ جەكە باقىلاۋىندا بولدى.

ىزدەستىرۋ جۇمىستارىنىڭ ناتيجەسىندە جەدەل ۋاكىلدەر جاس ءوسپىرىمدى تەمىر جول ۆوكزالىنان تاپتى. انەل بۇل كۇندەرى بەيتانىس ادامداردىڭ ۇيىندە جاسىرىنعان. ءوز بەتىنشە جۇمىسقا ورنالاسۋعا تىرىسقان»، - دەلىنگەن حابارلامادا.

كامەلەتكە تولماعان قىزدىڭ ايتۋىنشا، ۇيدەن قاشۋعا ونىڭ اناسىنىڭ ءجيى ۇرىپ-سوعۋى سەبەپ بولعان. جاس ءوسپىرىم ۇيگە بارۋدان تۇبەگەيلى باس تارتقان.

«قازىرگى تاڭدا اكىمدىك، ءبىلىم باسقارماسى جانە پوليتسيا قىزمەتكەرلەرى تاراپىنان ارنايى كوميسسيا قۇرىلدى. ولار اناسىن اتا-انا قۇقىعىنان ايىرۋ تۋرالى قۇجاتتاردى جينايدى.

بۇل ۋاقىت ارالىعىندا قىز كامەلەتكە تولماعانداردى بەيىمدەۋ جانە وڭالتۋ ورتالىعىنا ورنالاستىرىلادى»، - دەلىنگەن پوليتسيا تاراتقان حابارلامادا.