بۇقاشىقتار مەن قوشقارلاردى ەكسپورتقا شىعارۋعا كۆوتا ەنگىزىلدى
بۇل تۋرالى قازاقپارات ق ر اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
جاڭا ەرەجەلەرگە سايكەس كەلەسى ساندىق شەكتەۋلەر ەنگىزىلدى:
- قازاقستان اۋماعىنان ءۇشىنشى ەلدەرگە جانە ەۋرازيالىق ەكونوميكالىق وداق مەملەكەتتەرىنە (ەاەو سىرتقى ەكونوميكالىق قىزمەتىنىڭ تاۋار نومەنكلاتۋراسىنىڭ كودى 0102) 60000 باستان اسپايتىن بۇقاشىقتى شىعارۋعا؛
- قازاقستان اۋماعىنان ءۇشىنشى ەلدەرگە جانە ەاەو مەملەكەتتەرىنە (تاۋار نومەنكلاتۋراسىنىڭ كودى 0104) 120000 باستان اسپايتىن قوشقاردى شىعارۋعا رۇقسات.
بۇيرىققا سايكەس كۆوتالار تەك 12 ايدان اسقان بۇقالار مەن 6 ايدان اسقان قوشقارلارعا بەلگىلەنەدى، سونداي- اق انالىق مالعا قولدانىلمايدى.
ءى ق م بويىنشا ءبىر بورداقىلاۋ الاڭىنا 500، ءبىر تاۋار وندىرۋشىگە 200 باس، ال ۇساق مال بويىنشا ءبىر بورداقىلاۋ الاڭىنا 1000، ءبىر تاۋار وندىرۋشىگە 500 مال باسىنا كۆوتا الۋىنا رۇقسات.
«بۇگىنگى تاڭدا ەكسپورتقا باعىتتالعان 602 باس ءىرى قارا مال كارانتينگە قويىلدى»، - دەلىنگەن حابارلامادا.
