ەرلان قارين كەشە تاعايىندالعان ەكى جاس مينيسترگە قاتىستى پىكىر ءبىلدىردى

None
استانا. قازاقپارات - مەملەكەتتىك كەڭەسشى ەرلان قارين قوعامدا قىزۋ تالقىعا تۇسكەن ەكى جاس مينيستر - اسحات ورالوۆ پەن ءزۇلفيا سۇلەيمەنوۆاعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«الەۋمەتتىك جەلىلەردەگى پىكىرلەرگە ساي، سوڭعى كادرلىق وزگەرىستەر، اسىرەسە جاس كادرلاردىڭ باسشىلىق قىزمەتكە ورنالاسۋى قوعام تاراپىنان ۇلكەن قىزىعۋشىلىق تۋدىردى. وسىعان بايلانىستى جاڭا مينيسترلەر اسحات ورالوۆ پەن ءزۇلفيا سۇلەيمەنوۆا پرەزيدەنتتىك جاستار كادرلىق رەزەرۆىندە ەكەنىن اتاپ وتكىم كەلەدى. بۇل جوبا مەملەكەت باسشىسى قاسىم-جومارت توقايەۆتىڭ باستاماسىمەن 2019-جىلى قولعا الىنعان بولاتىن. بۇگىنگى تاڭدا ۇكىمەتتىڭ ءۇش مۇشەسى پرەزيدەنتتىك جاستار كادرلىق رەزەرۆىنىڭ وكىلدەرى»، - دەپ جازدى ەرلان قارين ءوزىنىڭ telegram ارناسىندا.

ونىڭ مالىمەتىنشە، پرەزيدەنتتىك جاستار كادرلىق رەزەرۆىندە 350 جاس بولسا، سونىڭ 258 ءى بۇگىندە ءتۇرلى جاۋاپتى قىزمەتتەرگە تاعايىندالعان. ونىڭ ىشىندە رەزەرۆتىڭ 34 وكىلى «ا» كورپۋسىنىڭ ساياسي جانە مەملەكەتتىك قىزمەتشىلەرى.

«وسىلايشا، جاس مامانداردى باسشىلىق لاۋازىمدارعا ۇسىنۋ بويىنشا جوسپارلى جۇمىس جالعاسۋدا. پرەزيدەنتتىك جاستار كادرلىق رەزەرۆى جوباسىن ودان ءارى جالعاستىرۋ پرەزيدەنتتىڭ سايلاۋالدى باعدارلاماسىنىڭ باسىمدىقتارىنىڭ ءبىرى»، - دەپ تۇيىندەدى مەملەكەتتىك كەڭەسشى.

ەسكە سالايىق، كەشە مەملەكەت باسشىسىنىڭ جارلىعىمەن اسحات ورالوۆ مادەنيەت جانە سپورت ءمينيسترى لاۋازىمىنا تاعايىندالعان بولاتىن. اسحات رازدىق ۇلى - ەڭ جاس مينيسترلەردىڭ ءبىرى. ول 1990-جىلى دۇنيەگە كەلگەن.

سونىمەن قاتار، سايكەس جارلىقپەن بۇل ۋاقىتقا دەيىن ۆيتسە-مينيستر قىزمەتىن اتقارىپ كەلگەن ءزۇلفيا سۇلەيمەنوۆا ەكولوگيا جانە تابيعي رەسۋرستار ءمينيسترى لاۋازىمىنا تاعايىندالدى. ءزۇلفيا بولات قىزى دا 1990-جىلى دۇنيەگە كەلگەن.

سوڭعى جاڭالىقتار