ەرلان قوشانوۆ: پرەزيدەنت «مەملەكەت قۇلامايدى» دەگەن ءبىر سوزىمەن حالىققا رۋح بەردى
بۇل پىكىردى پارلامەنت ءماجىلىسىنىڭ ءتوراعاسى ەرلان قوشانوۆ ايتتى، دەپ حابارلايدى قازاقپارات ءتىلشىسى.
«بۇگىن ءماجىلىس قابىرعاسىندا وسىمەن ەكىنشى رەت باس پروكۋرور مەن قۇقىق قورعاۋ ورگاندارىنىڭ باسشىلارىن تىڭدادىق. ەڭ باستى ايتار كەتەرلىگى - بۇل پارلامەنتتەگى تىڭداۋ تىكەلەي ەفيردە ءوتىپ جاتىر. بۇل مەملەكەتتىڭ، بيلىكتىڭ اشىقتىعىن جانە وسى اۋىر ماسەلەنى ەگجەي-تەگجەيلى انىقتاۋعا ەرەكشە مۇددەلى ەكەنىن كورسەتەدى. حالقىمىزدان جاسىراتىن ەشتەڭە جوق، سوعان قوعام دا شىندىققا كوز جەتكىزۋ كەرەك دەپ سانايمىز»، - دەدى پالاتا ءتوراعاسى.
ونىڭ ايتۋىنشا، قاڭتار وقيعاسىنىڭ ناقتى جوسپارلانعان اۋىر قىلمىس ەكەنىن دالەلدەيتىن فاكتىلەر جەتكىلىكتى، بۇگىن ايتىلدى. بۇل جايتتار باس پروكۋروردىڭ بايانداماسىندا دا تولىق قامتىلدى. ءبىر سوزبەن ايتقاندا، بۇگىنگى كۇنى قاڭتارداعى قايعىلى وقيعالاردىڭ نەگىزگى سەبەپ-سالدارى بەلگىلى دەۋگە بولادى.
«قاڭتاردى ۇيىمداستىرۋشىلاردىڭ كوزدەگەنى - قانتوگىسپەن بولسىن، قانداي دا جولمەن بيلىكتى باسىپ الۋ ەدى. ماجىلىستە كورسەتىلگەن ايعاقتار مەن قارۋ-جاراقتار كورمەسى بۇلىكتى ۇيىمداستىرعان توپتىڭ وسى پيعىلىن انىق دالەلدەيدى. ولار ءوز دەگەندەرىن جۇزەگە اسىرۋ ءۇشىن بەيبىت حالىقتى قالقان ەتتى، اڭعال جاستاردى اداستىرۋعا تىرىستى. بۇل اشىعىن ايتقاندا تاۋەلسىزدىككە جاسالعان قاستاندىق بولاتىن. ءبىراق حالقىمىزدىڭ اقىل-پاراساتى مەن بىرلىگىنىڭ ارقاسىندا، پرەزيدەنتىمىزدىڭ ەرىك-جىگەرىنىڭ ارقاسىندا مەملەكەتتىگىمىزدى ساقتاپ قالدىق»، - دەدى ە. قوشانوۆ.
سونىمەن بىرگە، ە. قوشانوۆ بۇلىكشىلەردىڭ باستى ماقساتى - حالىقتى ۇيرەيلەندىرىپ، قوعامدى الاساپىران قىلىپ، پرەزيدەنتتى قىزمەتىنەن كەتۋگە ماجبۇرلەۋ بولعانىن ايتتى.
«مەن مەملەكەت باسشىسىنىڭ وسىنداي قيىن جاعدايدا موينىنا اۋىر جاۋاپكەرشىلىك الىپ، باتىل شەشىمدەر قابىلداعانىنا كۋا بولدىم. ول تۋرالى ايتىلىپ تا، جازىلىپ تا ءجۇر. سونىڭ بارلىعى شىندىق. وسىنداي سىن-ساعاتتا ق. كەمەل ۇلى «مەملەكەت قۇلامايدى» دەگەن ءبىر اۋىز سوزىمەن حالىققا رۋح بەرىپ، ۇندەۋ جاريالادى. مەملەكەتتى بۇرىن-سوڭدى بولماعان قيىندىقتان الىپ شىقتى. ەڭ باستىسى، ەلدىڭ تۋى جىعىلعان جوق. كەشەگى جالپىۇلتتىق رەفەرەندۋمدا، پرەزيدەنت سايلاۋىندا حالىقتىڭ قاسىم-جومارت توقايەۆتى جاپپاي قولداۋى، زور سەنىمى وسىنىڭ شىنايى كورىنىسى، دالەلى دەپ سانايمىن»، - دەدى ءماجىلىس ءتوراعاسى.
ايتا كەتەيىك، بۇگىن ق ر باس پروكۋرورى بەرىك اسىلوۆ ماجىلىستە قاڭتار وقيعاسىنا قاتىستى دەپۋتاتتار ساۋالىنا جاۋاپ بەردى.
