قاڭتار وقيعاسىنا قاتىسقانداردىڭ ءبارى بىرەۋلەردىڭ ايداپ سالۋىمەن شىقپاعان - ابزال قۇسپان
بۇل تۋرالى ءماجىلىستىڭ جالپى وتىرىسىندا «امانات» قوعامدىق كوميسسياسىنىڭ ءتوراعاسى ابزال قۇسپان ايتتى، دەپ حابارلايدى قازاقپارات ءتىلشىسى.
«قاڭتار وقيعاسىنا بايلانىستى ميتينگكە قاتىسقانداردىڭ ءبارى بىرەۋلەردىڭ ايداپ سالۋىمەن شىقپاعان. جەكەلەگەن جاعدايدا ول جەرگىلىكتى جەردەگى باسشىلاردىڭ ماسەلەنى شەشۋدە قۇلىقسىزدىق تانىتۋىنان ورىن العانىن اتاپ كورسەتكىم كەلەدى. مىسالى، قىزىلوردا قالاسىندا بولعان جاپپاي تارتىپسىزدىك كەزىندە قازا تاپقان فارحات وماروۆتىڭ اناسى قازا تاپقان بالاسىنا قاتىستى قىلمىستىق ءىس قۇجاتتارىمەن تانىستىرىلماعان. جەرگىلىكتى اتقارۋشى ورگاننان ەشقانداي ماتەريالدىق كومەك الماعان. وسى سۇراقتارمەن قابىلداۋعا جازىلسا دا نە وبلىس پروكۋرورى، نە وبلىس اكىمى تاراپىنان قابىلدانباعان»، - دەدى ول.
ادۆوكاتتىڭ اتاپ وتۋىنشە، وسىنداي ماسەلەمەن كوميسسياعا قىزىلوردا وبلىسىنان بىرنەشە اتا-انا حابارلاسقان.
«وكىنىشتىسى سول، كوميسسيا بولىپ ارالاسساق تا جاعدايدى وزگەرتە المادىق. ناتيجەسىندە فارحاتتىڭ اناسى بيبىگۇل الىشيەۆا بىرنەشە مارتە استاناعا ۇشاقپەن كەلىپ، ميتينگكە شىعۋعا ءماجبۇر بولدى»، - دەدى ابزال قۇسپان.
