الماتىلىقتار «تاعزىم» مەموريالىنا گۇل شوقتارىن قويدى - فوتو

الماتى. قازاقپارات- قالا تۇرعىندارى قاڭتار وقيعاسى كەزىندە قازا تاپقانداردى ەسكە الىپ، «تاعزىم» مەموريالىنا گۇل شوقتارىن قويدى، دەپ حابارلايدى قازاقپارات ءتىلشىسى.

شاراعا قالا باسشىسى، قوعام قايراتكەرلەرى مەن الماتىلىقتار قاتىستى.

ءدىن قىزمەتكەرلەرى مارقۇمداردىڭ رۋحىنا قۇران باعىشتاپ، بەيبىتشىلىك پەن كەلىسىمنىڭ ماڭىزى تۋرالى ۋاعىز ايتتى.

جينالعاندارعا مەشىتتەردەگى اسقا بارۋ ءۇشىن كولىك دايىندالدى. بۇگىن قالا مەشىتتەرىندە قۇرباندىق شالىنىپ جاتىر.

سونىمەن قاتار، الماتى اكىمى ەربولات دوسايەۆ، قوعام قايراتكەرلەرى مەن شىعارماشىلىق زيالى قاۋىم وكىلدەرى قاڭتار وقيعاسى كەزىندە قازا تاپقاندارعا الماتىنىڭ ورتالىق مەشىتىندە قۇران باعىشتاپ، قۇربان شالدى.

ايتا كەتەيىك، 23-جەلتوقسان كۇنى قاسىم-جومارت توقايەۆ الماتى قالاسىنا جۇمىس ساپارى بارىسىندا، قاڭتار وقيعاسىنىڭ قۇرباندارىنا ارنالعان «تاعزىم» مەموريالىنىڭ اشىلۋ راسىمىنە قاتىسقان بولاتىن.

«تاعزىم» مەموريالى - كوپ ساتىلى ساۋلەت كەشەنى. بۇل ەسكەرتكىش ءارتۇرلى تۇستەن تۇراتىن ءتورت ەموتسيونالدى- ارحيتەكتۋرالىق بولىككە بولىنەدى. اتاپ ايتقاندا، اقشىل سۇر بولىگى ەڭسەرۋدى، قارا ءتۇس قاڭتار وقيعاسى كەزىندەگى دۇربەلەڭ مەن ۇرەيدى بەينەلەيدى، ال سۇر بولىگى - قۇربان بولعاندار مەن توگىلگەن قاننىڭ، ادام شىعىنىنىڭ سيمۆولى، اق ءتۇس تۇراقتىلىق پەن دامۋعا ۇمتىلۋدى، قوعامنىڭ ءال- اۋقاتىن، ۇلتتىڭ ءوزىن-ءوزى تانۋىن، كۇش پەن ادىلەتتى مەملەكەتكە دەگەن سەنىمدى بىلدىرەدى. ءار بولىكتە حالقىمىزدىڭ ۇلى تۇلعالارىنىڭ قاناتتى سوزدەرى جازىلعان تاستار مەن ستەللالار ورناتىلعان.

جوبانىڭ اۆتورلارى - قازاقستاندىق جاس ساۋلەتشىلەر الەكسەي يۆجەنكو جانە عايني ساعيدۋللايەۆا.

اۆتور

الما مۇقانوۆا