بۇلىكشىلەر شابۋىلدى الدىن الا سىزىلعان جوسپار بويىنشا جۇرگىزگەن - باس پروكۋراتۋرا

بۇل تۋرالى باس پروكۋراتۋرانىڭ «قاڭتار وقيعاسى: دەرەك پەن دايەك» دەرەكتى فيلمىندە باياندالعان، دەپ حابارلايدى قازاقپارات ءتىلشىسى.

«الماتى اكىمدىگىنە وت قويار ساتتەگى مىنا كادرلارعا نازار اۋدارۋ كەرەك. پوليتسيا قىزمەتكەرلەرى بەيبىت كەلسسوز جۇرگىزۋگە تىرىسىپ جاتقاندا، ءبىر ارانداتۋشى ورتاعا ءتۇسىپ، كوپشىلىكتى جاپپاي تارتىپسىزدىككە ۇندەيدى. اكىمدىكتى ورتەگەن سوڭ، بۇلىكشىلەر ىرگەدەگى پرەزيدەنت رەزيدەنتسياسىنا شابۋىلدايدى. بۇل ساتتەگى كادرلارعا قاراساق، شابۋىلدىڭ الدىن الا سىزىلعان جوسپار بويىنشا جۇرگىزىلگەنى انىق بايقالادى. الدىمەن تەمىر قورشاۋدى جۇك كولىگىمەن سوعىپ، سوسىن عيماراتقا قاراي بەت الادى. قالقاندارمەن قورعانا وتىرىپ، كۇزەتشىلەرگە وق جاۋدىرادى»، - دەلىنگەن باس پروكۋراتۋرا ۇسىنعان دەرەكتى فيلمدە.

ۆەدومستۆو مالىمەتىنە سايكەس، قاڭتار كەزىندە 12 ۇيىمداسقان قىلمىستىق توپ ارەكەت ەتكەن. ولاردىڭ ىشىندەگى بەلسەندىلەرى «ايشۋاق- جانتۇگەل» جانە «ديكي ارمان» توپتارى. سوڭعىسى قالانىڭ ءار جەرىنەن 24 ازاماتتى ۇرلاپ، ۇرىپ-سوعىپ «قازاقستان» جانە «Ritz Carlton» قوناق ۇيلەرىنىڭ پاركينگىندە ۇستاعان. دەرەكتى فيلمدە اتالعان قىلمىستىق توپتىق قولىندا بولعان ازامات سول كەزدە كورگەن قورلىعىن كۇيزەلىسپەن ەسكە الدى.

«بارلىعىمىزدى سول جەردە وتە قاتتى ازعىندىقپەن ۇستادى. ۇرىپ-سوعىپ، قان جوسا ەتىپ، تاڭەرتەڭ ساعات 11 لەر شاماسىندا بارلىعىمىزدى مال سياقتى جۇك كولىگىنە تيەدى. ول كونتەينەردە ۇرىپ-سوعىپ، ءبىر تاۋلىك ۇستادى»، - دەدى جابىرلەنۋشى.