قاڭتار وقيعاسىندا سودىرلاردىڭ ارەكەتىن راتسيامەن ۇيلەستىرۋشىلەر كىم ەكەنى ءالى انىقتالعان جوق - باس پروكۋرور
«قاڭتار وقيعاسى كەزىندە الماتى قالاسىندا اسكەري كيىنگەن، تولىق قارۋلانعان، بايلانىس قۇرالدارىمەن وتە جوعارى دارەجەدە قامتىلعان توپ پايدا بولدى. ولار قالانىڭ ىشىندە سودىرلاردىڭ بۇكىل ءجۇرىس-تۇرىسىن باسقاردى. ءبىراق قالادا جاعداي رەتتەلگەننەن كەيىن ول سودىرلار لەزدە جوعالىپ كەتتى. وسى ءبىر جىلدىڭ ىشىندە سول سودىرلاردىڭ بىرەۋى تابىلدى ما؟ ولارعا اسكەري كيىم مەن قارۋدى، راتسيانى كىم بەردى؟ وسى ماسەلەنىڭ ءمان-جايى زەرتتەلدى مە؟»، - دەپ سۇرادى دەپۋتات.
باس پروكۋروردىڭ ايتۋىنشا، ونداي اسكەري كيىم كيگەن توپتىڭ بولعانى راس. ءبىراق ولاردىڭ كىم ەكەنى ءالى انىقتالماعان.
«بۇل فاكتىلەر بويىنشا ۆەدومستۆوارالىق جەدەل تەرگەۋ توبى ارنايى قۇرىلعان، تەرگەۋ ءجۇرىپ جاتىر. سول كۇندەرى اسكەري كيىنگەن ادامدار رايىمبەك باتىر كوشەسىن تولىق باسىپ الىپ، بوگەتتەر ورناتىپ، كوشەنى جاۋىپ تاستاعانى بارىمىزگە بەلگىلى.
ءوزىڭىز ايتقان بالالار ينفەكسيالىق ەمحاناسى فيليالىنىڭ ماڭايىندا، ونىڭ تۇبىندە تۇرعان اۆتوكولىك تۇراعىنىڭ جانىندا، جانار-جاعارماي ستانساسىنىڭ جانىندا تۇرعان كوپتەگەن قىلمىسكەر بولعان»، - دەدى بەرىك اسىلوۆ.
ايتۋىنشا، اتالعان تۇلعالار ءالى كۇنگە دەيىن قولعا تۇسپەگەن.
«سول كۇندەرى ۇستاۋعا مۇمكىندىك بولمادى ما، ول كىسىلەردىڭ ءبارى ول كەزدە ۇستالعان جوق. ءوزىڭىز ايتقانداي، ولاردىڭ ءبارى بوي جاسىرىپ، قاشىپ كەتتى. بۇل ادامداردىڭ كىم ەكەنىن تەرگەۋ كەزىندە ءبىز ءالى انىقتاعان جوقپىز. ول كىسىلەردىڭ قاي جاققا كەتكەنىن، ارينە انىقتايمىز. بىزگە نەگىزى ۋاقىت كەرەك. قازىرگى تاڭدا كوپتەگەن جەدەل تەرگەۋ جۇمىستارى جالعاسۋدا»، - دەدى باس پروكۋرور.
