قاڭتار وقيعاسىندا ىشكى ىستەر ورگاندارىنىڭ ارناۋلى قۇرالداردى قولدانۋىنا تولىق نەگىز بولدى
«الماتىدا قالانىڭ ەكى جاعىنان جينالعان مىڭداعان ادام ورتالىق الاڭعا بەت الدى. قوعامدىق جاپپاي ءتارتىپتى بۇزۋ باستالدى. زاڭسىز شەرۋ ۇيىمداستىرىلدى. قالادا كەپتەلىستەر پايدا بولدى. نارازىلىققا شىققانداردىڭ سانى ارتتى. دەمونسترانتتار كولىكتەردى توقتاتتى. جۇرگىزۋشىلەر مەن جولاۋشىلاردى الاڭعا بارۋعا ماجبۇرلەدى. جولدا ولار ارماتۋرامەن، تاياقتارمەن جانە تاستارمەن قارۋلاندى. پوليتسيانىڭ زاڭدى تالاپتارىنا باعىنبادى. ونىمەن شەكتەلمەي، زاڭسىز شەرۋدى توقتاتۋعا جۇمىلعان ۇلتتىق ۇلاننىڭ 250 اسكەري قىزمەتكەرىنە شابۋىل جاسادى. ولاردىڭ 30-ى دەنە جاراقاتىن الدى. ولارعا كومەكتەسۋ ءۇشىن قوسىمشا قىزمەتكەرلەر مەن سوبر تارتىلدى»، - دەدى مارات احمەتجانوۆ.
ونىڭ ايتۋىنشا، ورىن العان جاعداي ەسكەرىلە وتىرىپ، پوليتسيا قىزمەتكەرلەرى مەن ۇلتتىق ۇلاننىڭ اسكەري قىزمەتشىلەرى ادام ءولىم- جىتىمىنە سەبەپكەر بولمايتىن ارناۋلى قۇرالدارمەن جابدىقتالعان. شابۋىلداۋشىلارمەن قاقتىعىسقان ساتتە مۇنداي قۇرالدار قوعامدىق ءتارتىپتى قالپىنا كەلتىرۋ ءۇشىن قولدانىلعان.
«بۇل قۇرالدار «قۇقىق قورعاۋ قىزمەتى تۋرالى» زاڭعا ساي جۇزەگە اسىرىلدى. ول ءۇشىن بارلىق نەگىز بولدى: جاپپاي تارتىپسىزدىكتەر مەن قوعامدىق ءتارتىپتى توپتاسىپ بۇزۋ، ازاماتتارعا، قىزمەتكەرلەرگە، عيماراتتارعا، كولىك قۇرالدارىنا شابۋىلداردى تويتارۋ، ىشكى ىستەر ورگاندارى قىزمەتكەرلەرىنىڭ زاڭدى تالاپتارىنا باعىنباعان تۇلعالاردى ۇستاۋ»، - دەدى مينيستر.
فوتو: Reuters
اۆتور
مارلان جيەمباي
