بەلگىلى ءبىر دارەجەدە قوزعالا المايدى - ادۆوكات ءبىرتانوۆتىڭ دەنساۋلىعى سىر بەرگەنىن ايتتى

استانا. قازاقپارات - ادۆوكات بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ قاماۋدا بولعان كەزدە باستالعان اۋرۋى اسقىنعانىن مالىمدەدى، - دەپ حابارلايدى Massaget.kz ءتىلشىسى.

«كەشە تاڭەرتەڭ ەلجان امانتاي ۇلىنىڭ تەرگەۋ يزولياتورىندا باستالعان اۋىرۋى اسقىنىپ كەتتى. بۇل ءبىرىنشى رەت ەمەس، وعان بىرنەشە رەت شۇعىل وپەراتسيا ۇسىنىلعانىن بىلەمىز. ءبىراق ول بەلگىلى ءبىر ويعا، جاعدايلارعا بايلانىستى ونى كەيىنگە قالدىردى. ال قازىر بۇل جاعداي قايتالانىپ وتىر، ول قازىر بەلگىلى ءبىر دارەجەدە قوزعالا المايدى»، - دەدى ادۆوكات نۇرلان بەيسەكەيەۆ.

ەڭبەككە ۋاقىتشا جارامسىزدىق پاراعىنا سايكەس، اۋىرىپ جاتقانىن راستايتىن قۇجات 6- قاڭتارعا دەيىن اشىلعان.

«ەلجان امانتاي ۇلىنىڭ قاتىسۋى مىندەتتى بولعاندىقتان، سوت پروتسەسىن شەگەرۋدى سۇرار ەدىم»، - دەگەن ادۆوكات.

ناتيجەسىندە سوت وتىرىسى 6- قاڭتارعا شەگەرىلگەن.

ەسكە سالايىق، بۇعان دەيىن ەكس-مينيستر ءبىرتانوۆ سوتتا سوڭعى ءسوزىن ايتقان بولاتىن.