الماتى تاۋلارىندا قار كوشكىنى ءجۇردى

الماتى. قازاقپارات - الماتىداعى شىمبۇلاق اۋماعىندا قار كوشكىنى ءجۇردى، دەپ حابارلايدى قازاقپارات ءتىلشىسى.

الماتى قالالىق توتەنشە جاعدايلار دەپارتامەنتىنىڭ مالىمەتىنشە، بۇگىن تۇسكى ساعات 12:33 تە «ەدەلۆەيس» قوناق ءۇيى اۋدانىنداعى كىشى الماتى وزەنى باسسەينىندە قار كوشكىنى ءجۇردى.

«تۇسكەن قار ماسساسى - 700 تەكشە مەتر. كوشكىن شىمبۇلاق-تۇيىق سۋ جولىندا توقتاپ، ونى جاۋىپ تاستادى. قازا بولعاندار، زارداپ شەككەندەر جوق. قيراۋ دا تىركەلگەن جوق. جولدى «قازسەلدەنقورعاۋ» م م تازالادى»، - دەپ حابارلادى ۆەدومستۆودان.

قۇتقارۋشىلار تۇرعىنداردى قار كوشكىنىن تۋدىرماۋ ءۇشىن تاۋ بەتكەيلەرىنە شىقپاۋعا، سونداي-اق جەكە قاۋىپسىزدىك شارالارىن ساقتاۋعا، تاۋدا جاياۋ سەرۋەندەۋدەن باس تارتۋعا شاقىرادى.

بۇعان دەيىن شىمبۇلاق پەن ۇلكەن الماتى كولىنە باراتىن جول جابىلعانى تۋرالى جازعان بولاتىنبىز.