قازاقستاندا زەينەتاقى مەن جاردەماقى ءوستى
اتاپ ايتقاندا، بۇل وزگەرىس زەينەتاقى مەن جاردەماقى الاتىن 4,4 ميلليون ادامعا اسەر ەتەدى.
وسى ماقساتتارعا رەسپۋبليكالىق بيۋدجەتتە 4,6 تريلليون تەڭگە قاراستىرىلعان.
«بازالىق زەينەتاقىنىڭ مولشەرى ەڭ تومەنگى كۇنكورىس دەڭگەيىنىڭ جىل سايىنعى ۇلعايۋىن ەسكەرە وتىرىپ، سونداي- اق مەملەكەت باسشىسىنىڭ تاپسىرماسىنا سايكەس، ونىڭ ەڭ تومەنگى مولشەرى ەڭ تومەنگى كۇنكورىس دەڭگەيىنىڭ 54 پايىزدان 60 پايىزعا دەيىن ۇلعايۋىنا بايلانىستى ارتتى. ىنتىماقتى زەينەتاقى مولشەرى ينفلياتسيا دەڭگەيىنەن 2 پايىزعا ارتىپ كوتەرىلدى. بۇدان باسقا، مەملەكەت باسشىسىنىڭ تاپسىرماسىنا سايكەس، ىنتىماقتى زەينەتاقىنى ەسەپتەۋ ءۇشىن پايدالانىلاتىن ەڭ جوعارى تابىس مولشەرى 46 دان 55 ا ە ك- كە دەيىن (158,7-دەن 189,8 مىڭ تەڭگەگە دەيىن) ۇلعايتىلدى»، - دەلىنگەن ەڭبەك جانە حالىقتى الەۋمەتتىك قورعاۋ مينيسترلىگى مالىمەتىندە.
وسى ورايدا بيۋدجەتتەن تولەنەتىن زەينەتاقى تولەمدەرىنىڭ ەڭ تومەنگى مولشەرى 68,2 مىڭ تەڭگەدەن 77,4 مىڭ تەڭگەگە دەيىن ءوستى. زەينەتاقىنىڭ ءوسۋى بارلىق 2,2 ميلليون زەينەتكەرگە اسەر ەتتى.
«ەڭ تومەنگى كۇنكورىس دەڭگەيىنىڭ ۇلعايۋىنا بايلانىستى مۇگەدەكتىك جانە اسىراۋشىسىنان ايىرىلعان جاعدايدا تولەنەتىن جاردەماقىلاردىڭ مولشەرى دە ارتتى. ايلىق ەسەپتىك كورسەتكىش (ا ە ك) مولشەرىنىڭ ۇلعايۋىنا بايلانىستى تاعى دا ءبىرقاتار جاردەماقىنىڭ مولشەرى ءوستى. ماسەلەن، جۇمىس ىستەيتىن دە، جۇمىس ىستەمەيتىن دە ايەلدەرگە بالا تۋۋعا بايلانىستى تولەنەتىن مەملەكەتتىك قولداۋدىڭ مولشەرى ەندى: ءبىرىنشى، ەكىنشى جانە ءۇشىنشى بالاعا 38 ا ە ك نەمەسە 131100 تەڭگە (2022 -جىلى - 120840 تەڭگە)، ءتورتىنشى جانە ودان دا كوپ بالاعا - 63 ا ە ك نەمەسە 217350 تەڭگەنى (2022 -جىلى - 200340 تەڭگە) قۇرايدى»، - دەپ اتالىپ وتكەن مينيسترلىك حابارلاماسىندا.
رەسپۋبليكالىق بيۋدجەتتەن جۇمىس ىستەمەيتىن اتا-انالارعا بالا كۇتىمى بويىنشا جاردەماقى بەرىلەدى، ونىڭ مولشەرى ا ە ك ءوسۋىن ەسكەرە وتىرىپ، بيىلدان باستاپ 8,5 پايىزعا ءوستى.
جۇمىس ىستەيتىن اتا-انالار بالا كۇتىمى بويىنشا الەۋمەتتىك تولەمدەردى مەملەكەتتىك الەۋمەتتىك ساقتاندىرۋ قورىنان الادى. 2023 -جىلدان باستاپ پرەزيدەنت تاپسىرماسى بويىنشا بالا كۇتىمى بويىنشا تولەم مەرزىمى ءبىر جىلدان ءبىر جارىم جىلعا دەيىن ۇزاردى.
مۇگەدەكتىگى بار بالالاردى قولداۋ ءۇشىن قازاقستاندا كامەلەتكە تولعانعا دەيىن ارناۋلى مەملەكەتتىك جاردەماقى تولەنەدى. ونىڭ مولشەرى 2023 -جىلى 56794 تەڭگەنى (بۇرىن 52345 تەڭگە) قۇرايدى.
جاڭا جىلدان باستاپ كوپبالالى وتباسىلارعا ارنالعان جاردەماقى مولشەرى ا ە ك ۇلعايۋىن ەسكەرە وتىرىپ ءوستى: 4 بالاسى بار وتباسىلارعا اي سايىن 55304 تەڭگە (بۇرىن 50976 تەڭگە)، 5 بالاعا - 69138 تەڭگە (بۇرىن 63728 تەڭگە)، 6 بالاعا - 82973 تەڭگە (بۇرىن 76479 تەڭگە)، 7 بالاعا - 96807 تەڭگە (بۇرىن 89231 تەڭگە)، 8 جانە ودان كوپ بالا بولسا ءار بالاعا - 13800 تەڭگەدەن (بۇرىن 12720 تەڭگە) بەرىلەدى.
