20:12, 29 - جەلتوقسان 2022 | GMT +5
استانادا ەر ادام تانىس كەلىنشەكتىڭ سۋ جاڭا كولىگىن ورتەپ جىبەرگەن
استانا. قازاقپارات - استانادا ەر ادام تانىسىنىڭ قىمبات كولىگىن ورتەپ جىبەرگەن، - دەپ حابارلايدى Polisia.kz.
تاڭەرتەڭ ساعات 05.50 دە پوليتسياعا Hyundai Tucson اۆتوكولىگىنىڭ ورتەنگەنى تۋرالى حابارلاما كەلىپ ءتۇستى. كولىك كۇيشى دينا كوشەسىندەگى تۇرعىن ءۇيدىڭ اۋلاسىندا بولعان.
شاقىرۋ بويىنشا كەلگەن پوليتسەيلەر 42 جاستاعى ەر ادامدى كولىكتىڭ جانىنان ۇستادى. ول ماس كۇيىندە جەك كورەتىن تانىسىنىڭ كولىگىن ورتەپ جىبەرگەنى انىقتالدى. قولايلى ءساتتى كۇتكەن ەر ادام تۇندە تانىس ايەلدىڭ اۋلاسىنا كەلىپ، كولىككە بەنزين شاشىپ، ونى ورتەپ جىبەرگەن.
جابىرلەنۋشىگە 19 ميلليون تەڭگە كولەمىندە شىعىن كەلدى. وقيعا ورنىنا كەلگەن ءورت ءسوندىرۋ قىزمەتىنىڭ قىزمەتكەرلەرى ءورتتى ءوشىردى.
بوتەننىڭ مۇلكىنە قاساقانا زاقىم كەلتىرۋ فاكتىسى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. كۇدىكتى ەر ادام پ د ۋاقىتشا ۇستاۋ يزولياتورىنا قامالدى.
