قايرات ساتىبالدىعا قاتىستى ءىس: باسقا دا ەپيزودتار تەرگەلىپ جاتىر

بۇل ق ر سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ ورىنباسارى ۇلان سارقۇلوۆ ايتتى، دەپ حابارلايدى قازاقپارات ءتىلشىسى.

«باستى ءىس بويىنشا تەرگەۋ امالدارى اياقتالىپ، شەشىم شىعارىلدى. ەندى، ارى قاراي ءتيىستى جۇمىستار جۇرگىزىلەدى»، - دەدى ۇ. سارقۇلوۆ سەناتتىڭ جالپى وتىرىسىنان كەيىن تىلشىلەر سۇراعىنا جاتساپ بەرە وتىرىپ.

سونىمەن قاتار تىلشىلەر «قايرات ساتىبالدىعا قاتىستى ۇكىمدە قامتىلعان دەرەكتەردەن بولەك، قازىر باسقا ەپيزودتار تەرگەلىپ جاتىر ما» دەگەن سۇراق قويدى.

ءوز كەزەگىندە ۇ. سارقۇلوۆ باسقا دەرەكتەر تەرگەلىپ جاتقانىن ناقتىلادى.

ونىڭ ايتۋىنشا، بارلىق ىستەر بويىنشا اكتيۆتەردى قايتارۋ بويىنشا جۇيەلى جۇمىس ءجۇرىپ جاتىر. قىلمىستىق ىستەر پروكۋراتۋرا باقىلاۋىندا تۇر.

«تەرگەۋ قۇپيالىعىن ساقتاۋ ماسەلەسى بار ەكەنىن ءتۇسىنۋ كەرەك. ەگەر بارلىق دەرەكتەردى اشىق جاريالاساق، وندا بۇل ارەكەت تەرگەۋگە كەدەرگى كەلتىرۋى مۇمكىن»، - دەدى اگەنتتىك ءتوراعاسىنىڭ ورىنباسارى.

بۇدان بۇرىن حابارلانعانداي، بيىل قىركۇيەك ايىندا قايرات ساتىبالدى 6 جىلعا سوتتالدى.

سونىمەن قاتار، باس پروكۋراتۋرا وعان قاتىستى باسقا ىستەر قارالىپ جاتقانىن مالىمدەگەن ەدى.

ق. ساتىبالدى شەتەلدىك باعالى قاعازدارعا 300 ميلليون ا ق ش دوللارىن سالۋ فاكتىسى انىقتالدى.