سەنات تازى مەن توبەت تۇقىمىن كوبەيتۋ تۋرالى زاڭ قابىلدادى
قۇجاتتىڭ نەگىزگى ماقساتى - قازاقى تازى جانە توبەت ءيت تۇقىمدارىن ساقتاۋ سالاسىنداعى قىزمەتتى جۇزەگە اسىرۋدىڭ قۇقىقتىق، ۇيىمداستىرۋشىلىق جانە ەكونوميكالىق نەگىزدەرىن بەلگىلەۋ.
اتاپ ايتقاندا، قازاقى ءيت تۇقىمدارىن ساقتاۋ جانە كوبەيتۋ سالاسىنداعى مەملەكەتتىك باسقارۋدىڭ نەگىزگى قاعيداتتارى بەلگىلەنەدى. قازاقى ءيت تۇقىمدارىنىڭ ساقتالۋىن قامتاماسىز ەتۋ جۇيەسىنە جاۋاپتى مەملەكەتتىك ورگاندار مەن ۇيىمدار ايقىندالادى. وندا ۋاكىلەتتى ورگاننىڭ قۇزىرەتىنە قازاقى ءيت تۇقىمدارىنىڭ ەسەبىن جۇرگىزۋ مونيتورينگىن جۇزەگە اسىرۋ جانە قازاقى ءيت تۇقىمدارىنىڭ ستاندارتتارىن بەكىتۋ سياقتى فۋنكتسيالار جاتقىزىلادى.
بۇدان باسقا، قۇجاتتا ۋاكىلەتتى ورگان ايقىنداعان مامانداندىرىلعان ۇيىمنىڭ قۇرىلىمدىق بولىمشەسى بولاتىن قازاقى ءيت تۇقىمدارىنىڭ ۇلتتىق ورتالىعىن قۇرۋ، سونداي-اق قازاقى ءيت تۇقىمدارىن ساقتاۋ جانە كوبەيتۋ سالاسىنداعى قىزمەتتى قارجىلاندىرۋ كوزدەلەدى.
سەناتتىڭ جالپى وتىرىسىندا زاڭ جوباسىن پارلامەنت ءماجىلىسىنىڭ دەپۋتاتى ەلدوس اباقانوۆ تانىستىردى.
«ورتالىقتىڭ نەگىزگى قۇزىرەتىنە ءبىرىڭعاي اسىل تۇقىمدى قازاقى تازى مەن توبەتتىڭ كىتابىن جۇرگىزۋ، اتالعان تۇقىمداردىڭ ستاندارتتارىن ازىرلەۋ جانە باسقا دا مىندەتتەر كىرەدى. سونىمەن قاتار، زاڭ جوباسى كينولوگيالىق قىزمەت ۇعىمدارىن، قازاقى تۇقىمدى ءيتتىڭ شىعۋ تەگى تۋرالى كۋالىكتى، ءبىرىڭعاي اسىل تۇقىمدى كىتاپتى، قازاق ءيت تۇقىمدارى مەن ۇلتتىق اڭشىلىق ۇعىمىن ايقىندايدى»، - دەدى دەپۋتات.
سونداي-اق زاڭ جوباسىندا قازاقستان رەسپۋبليكاسىنىڭ عىلىمي ۇيىمدارى جۇزەگە اسىراتىن قازاق ءيت تۇقىمدارىن ساقتاۋ جانە كوبەيتۋ سالاسىنداعى عىلىمي زەرتتەۋلەر جونىندەگى نورما كوزدەلگەن. عىلىمي ۇيىمدار ۋاكىلەتتى ورگانمەن، ۇلتتىق ورتالىقپەن، كينولوگيالىق قىزمەتتى جۇزەگە اسىراتىن قوعامدىق بىرلەستىكتەرمەن بىرلەسىپ، بۇل سالادا مەملەكەتتىك عىلىمي- تەحنيكالىق باعدارلامالار ازىرلەيدى.
بۇدان بۇرىن حابارلانعانداي، اتالعان قۇجاتتى ماجىلىستە تالقىلاۋ كەزىندە زاڭ جوباسىنىڭ نورمالارىن ىسكە اسىرۋ ءۇشىن 1,4 ميلليارد تەڭگە قاجەت بولاتىنى ايتىلعان ەدى. بۇل سوما 18-قازاندا رەسپۋبليكالىق بيۋدجەت كوميسسياسىنىڭ وتىرىسىندا قولداۋ تاپتى.
ەسكە سالساق، تامىز ايىندا قازاقى تازى مەن توبەتتى ساقتاۋ ماسەلەسىن پرەزيدەنتتىڭ ءىس باسقارماسى قولعا العانى حابارلانعان.
