جول جابىلاتىنى تۋرالى ەسكەرتۋدى ەلەمەيتىندەر جاۋاپقا تارتىلۋى مۇمكىن

رەسپۋبليكالىق جولداردا كولىك قوزعالىسىن 150 دەن استام رەت شەكتەۋگە تۋرا كەلدى. بۇل تۋرالى قازاقپارات يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ حابارلايدى.

توتەنشە جاعدايلاردىڭ الدىن الۋ ءۇشىن اۆتوموبيل جولدارى كوميتەتى كولىك جۇرگىزۋشىلەرىنە تۇراقتى نەگىزدە داۋىل تۋرالى حابارلامالاردى جىبەرىپ، الىس ساپارلارعا شىقپاۋعا كەڭەس بەرگەنىمەن، بۇعان نەمقۇرايلى تانىتقان كوپتەگەن ادام قار قۇرساۋىندا قالىپ جاتادى. ماسەلەن، رەسپۋبليكالىق ماڭىزداعى اۆتوجولدار قىسقى كۇتىپ ۇستاۋ كەزەڭىنە اۋىستىرىلعان ساتتەن باستاپ، جول سالاسىنىڭ مامانداردى كۇرە جولدىڭ بويىندا 600 گە جۋىق ادامعا كومەك كورسەتكەن. اتاپ ايتقاندا، اۋا رايىنىڭ قولايسىزدىعىنا بايلانىستى 232 كولىك جىلى بوكستارعا ورنالاستىرىلسا، 563 ادام جىلىتۋ پۋنكتەرىنە جەتكىزىلدى.

مينيسترلىك اۆتوموبيل جولدارىن كۇتىپ ۇستايتىن قىزمەتكەرلەردىڭ تەحنيكاسى كولىكتى قار قۇرساۋىنان شىعارۋعا نەمەسە ەۆاكۋاتسيالاۋعا بەيىمدەلمەگەنىنە نازار اۋدارادى. سوعان قاراماستان، سالا ماماندارى ءتيىستى ەسكەرتۋدى ەلەمەگەن جۇرگىزۋشىلەردىڭ باتىپ قالعان كولىكتەرىن شىعارۋعا ءماجبۇر. نەگە دەسەڭىز، جولدى تازالاۋ ءۇشىن ونىڭ بويىندا قانداي دا ءبىر كەدەرگى بولماۋى ءتيىس.

وسى رەتتە بيىلدان باستاپ اۋا رايىنىڭ قولايسىزدىعىنا قاتىستى كولىك قوزعالىسىن شەكتەۋ جونىندەگى حابارلامانى ەسكەرمەگەن تۇلعالارعا اكىمشىلىك جاۋاپكەرشىلىك قاراستىرىلماق. ءتيىستى وزگەرىس ۇكىمەتتىڭ «جولدارداعى كولىك قۇرالدارىنىڭ قوزعالىسىن توقتاتۋ نەمەسە ۋاقىتشا شەكتەۋ قاعيدالارىن بەكىتۋ تۋرالى» قاۋلىسىنا ەنگىزىلدى.

«تاياۋ اراداعى مەرەكەلىك دەمالىس كۇندەرىندە كوپتەگەن ادام قالادان تىس جەردە دەمالۋدى جوسپارلايتىنى ءمالىم. وسىعان بايلانىستى اۆتوموبيل جولدارى كوميتەتى كولىك يەلەرىن داۋىل تۋرالى حابارلامانى العان بويدا ساقتىق شارالارىن ۇستانىپ، ۇزاق ساپارعا شىعۋعا باس تارتۋدى سۇرايدى. سونداي- اق، قانداي ءبىر جاعدايلار تۋىنداعاندا 1403 ءبىرىڭعاي call-ورتالىعىنا حابارلاسۋعا بولاتىنىن ەسكە سالا كەتەيىك»، - دەلىنگەن رەسمي حابارلامادا.