استانادا جاڭادان قۇرىلاتىن اۋدانعا نۇرا اتاۋى بەرىلدى

2022 -جىلعى 1-جەلتوقساندا استانا قالاسى ونوماستيكاسىنىڭ كەزەكتى وتىرىسى ءوتتى. وندا ەلوردا ومىرىندەگى ماڭىزدى ماسەلەلەردىڭ ءبىرى - جاڭا اۋداننىڭ اتىن قويۋ جانە بىرنەشە قۇرامداس بولىكتەرگە ات بەرۋ ماسەلەسى تالقىلانعان.

«وزدەرىڭىز جاقسى بىلەسىزدەر، قالامىزدا بەسىنشى اۋدان قۇرۋ ماسەلەسى ءبىرازدان بەرى كوتەرىلدى. بۇل جونىندە قالاداعى زيالى قاۋىممەن، اعا بۋىنمەن اقىلداستىق، ەلىمىزدىڭ تاريحىنا، جەر- سۋ گەوگرافياسىنا قاتىستى مالىمەتتى قاراستىردىق. سوڭىندا ەكى نەگىزگى ۇسىنىستى ونوماستيكا كوميسسياسىنىڭ كۇن تاربىتىنە الىپ شىقتىق. سوڭىندا نۇرا اتاۋى تاڭدالدى»، - دەدى قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ ءماسليحات وتىرىسىندا.

جاڭا اۋدانعا قاتىستى ەكىنشى ۇسىنىس - قاراوتكەل اتاۋى بولعان. بۇل جونىندە لينگۆيستەر قازاق ءتىلى عىلىمىندا ەكى داۋىستى دىبىستىڭ قاتار كەلۋى دۇرىس ەمەس دەپ سىن ايتقان.

«نۇرا - اقمولا وبلىسى اۋماعىنداعى وزەن، ۇزىندىعى مىڭ شاقىرىمعا جۋىقتايدى، ەكى جۇزدەي سالاسى بار، قارقارالى تاۋىنان باستالىپ، قورعالجىنداعى تەڭىز كولىنە كەلىپ قۇيادى. نۇرا - تاريحىمىز بەن گەوگرافيامىزداعى ماڭىزدى وزەندەردىڭ ءبىرى، ەسىل مەن نۇرا «قوس وزەن» دەپ تە اتالعان. وسى ءبىر سيمۆولدىق ءماندى قاراستىرىپ، سول جاعالاۋدا قابانباي باتىر داڭعىلى مەن ەسىلدىڭ ءبىر جاعىندا نۇرا اۋدانى بولسا، ەگىز ۇعىم بولادى دەگەن توقتامعا كەلدىك. جالپى قوس وزەن مادەنيەتى ەلىمىزدە عانا ەمەس، الەمدە بار - ەفرات پەن تيگر، ەدىل مەن جايىق، سىرداريا مەن ءامۋداريا، شۋ مەن تالاستىڭ ورتاسىندا قازاق حاندىعى قۇرىلعانىن بىلەسىزدەر. وسى سەبەپتى نۇرا مەن ەسىلدى قاتار قويدىق»، - دەدى ساكەن ەسىركەپ.

ءماسليحات دەپۋتاتتارى بۇل ۇسىنىستى ماقۇلداندى جانە قۇجات ۇكىمەت جانىنداعى رەسپۋبليكالىق ونوماستيكالىق كوميسسياعا جىبەرىلدى.