قازاقستان مەن وزبەكستان ساراپشىلارى ىنتىماقتاستىقتى ارتتىرۋ جوسپارىن تالقىلادى

قازاقستان رەسپۋبليكاسى پرەزيدەنتىنىڭ وزبەكستانعا مەملەكەتتىك ساپارىنىڭ قورىتىندىلارى بويىنشا ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى، وزبەكستان رەسپۋبليكاسى پرەزيدەنتى جانىنداعى ستراتەگيالىق جانە ءوڭىرارالىق زەرتتەۋلەر ينستيتۋتى، ورتالىق ازيا حالىقارالىق ينستيتۋتىنىڭ ۇيىمداستىرۋىمەن «وزبەكستان جانە قازاقستان: دوستىق، سەرىكتەستىك جانە وداقتاستىق» اتتى ونلاين حالىقارالىق كونفەرەنسيا ءوتتى.

العى ءسوزدى قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ە. قونىسپايەۆ، وزبەكستان رەسپۋبليكاسى سىرتقى ىستەر ءمينيسترىنىڭ ورىنباسارى ب. الويەۆ، قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى ب. اتامقۇلوۆ، قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ديرەكتورى ە. تۇقىموۆ، وزبەكستان رەسپۋبليكاسى پرەزيدەنتى جانىنداعى ستراتەگيالىق جانە ءوڭىرارالىق زەرتتەۋلەر ينستيتۋتىنىڭ ديرەكتورى ە. اريپوۆ، سونداي-اق ورتالىق ازيا حالىقارالىق ينستيتۋتى ديرەكتورىنىڭ ورىنباسارى ف. قاديروۆ سويلەدى.

تالقىلاۋدىڭ نەگىزگى تاقىرىپتارى قازىرگى جاھاندىق جانە وڭىرلىك ۇردىستەر كونتەكستىندەگى ساياسي ديالوگ، سونداي-اق ەكونوميكا، كولىك، ەنەرگەتيكا جانە سۋ رەسۋرستارى سالالارىنداعى ىنتىماقتاستىقتىڭ جاڭا ستراتەگيالىق پەرسپەكتيۆالارى بولدى.

اتاپ ايتقاندا، ق س ز ي ديرەكتورى ە. تۇقىموۆ بولاشاقتىڭ دامۋ بارىسى مەن ستراتەگيالىق جوسپارلاۋىن بىرلەسە وتىرىپ ازىرلەۋ قاجەتتىگىن اتاپ ءوتتى: «ءبىزدى بىرىكتىرىپ وتىرعان ورتاق تاريح، مادەنيەت جانە گەوگرافيا بۇگىنگى تاڭدا قوس ەل اراسىنداعى قارىم-قاتىناستى ەرەكشە جولمەن، ءوزارا سەنىمنىڭ جوعارى دەڭگەيى ارقىلى قۇرۋدى نەگىزدەيدى. قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ اعىمداعى جىلدىڭ 21-22- جەلتوقسانىنداعى وزبەكستانعا مەملەكەتتىك ساپارى بارلىق سالالارداعى ىنتىماقتاستىقتى كەڭەيتۋدىڭ ستراتەگيالىق پەرسپەكتيۆالارىنا نەگىز قالادى. جالپى قازاقستان مەن وزبەكستان اراسىنداعى قارىم-قاتىناستىڭ قارقىندىلىعى بۇكىل ورتالىق ازيا ءوڭىرى ەلدەرىنىڭ ىنتىماقتاستىعىن ودان ءارى دامىتۋعا باعىت بەرەدى. سول سەبەپتى مۇنىڭ بارلىعىن ەسكەرگەن وتە ماڭىزدى».

وزبەكستان رەسپۋبليكاسى پرەزيدەنتى جانىنداعى ستراتەگيالىق جانە ءوڭىرارالىق زەرتتەۋلەر ينستيتۋتىنىڭ ديرەكتورى ە. اريپوۆ ءوز سوزىندە قازاقستان پرەزيدەنتى قاسىم-جومارت توقايەۆتىڭ وزبەكستانعا مەملەكەتتىك ساپارى ماڭىزدى تاريحي وقيعا بولعانىن اتاپ ءوتتى. «وزبەكستان پرەزيدەنتى شاۆكات ميرومونوۆيچ ميرزيەيەۆتىڭ قازاقستانعا مەملەكەتتىك ساپارى بارىسىنداعى وداقتاستىق قاتىناستار تۋرالى دەكلاراتسياعا قول قويىلعاننان كەيىنگى ءبىر جىل ىشىندە وداقتاستىق قاتىناستاردى ورناتۋعا قول جەتكىزگەنىمىز قۋانتادى»، - دەدى ساراپشى.

ورتالىق ازيا حالىقارالىق ينستيتۋتى ديرەكتورىنىڭ ورىنباسارى ف. قاديروۆ قازاقستان رەسپۋبليكاسى مەن وزبەكستان رەسپۋبليكاسى اراسىنداعى قارىم-قاتىناستىڭ جوعارى قارقىنىن اتاپ ءوتتى. ساياسي دەڭگەيدە ءوسىپ كەلە جاتقان ءوزارا تۇسىنىستىك ەكونوميكالىق كورسەتكىشتەردە، ونىڭ ىشىندە جۇك تاسىمالداۋدا، اۋە قاتىناستارى مەن جولاۋشىلار تاسىمالىندا كورىنىس تاپتى. بىرلەسكەن كاسىپورىندار سانى 6 ەسەگە ءوستى. بيزنەس-قوعامداستىق ماشينا جاساۋ، اۆتوموبيلدەر مەن جابدىقتار شىعارۋ سالالارىندا ناقتى جوبالاردى جۇزەگە اسىرۋدا.

حالىقارالىق كونفەرەنتسيا بارىسىندا ەكىجاقتى قارىم-قاتىناستاردىڭ نەگىزگى تەندەنتسيالارى بارلىق سالالاردا، ونىڭ ىشىندە ساياسي، ساۋدا-ەكونوميكالىق، مادەني-گۋمانيتارلىق جانە ت. ب. سالالاردا جەمىستى ىنتىماقتاستىققا دەگەن ءوزارا ۇمتىلىس ەكەندىگى تۋرالى وي ايتىلدى. سوندىقتان عىلىمي-زەرتتەۋ رەسۋرستارى بار ساراپتاما ورتالىقتارى ورتالىق ازياداعى ءوزارا ءتيىمدى ىنتىماقتاستىقتى ودان ءارى كەڭەيتۋ ءۇشىن بار كۇش-جىگەرىن سالۋى كەرەك.