تۇرعىن ءۇي قۇرىلىسىنا ۇلەستىك قاتىسۋ زاڭناماسىن ەلەمەي جۇرگەن كومپانيالار بار - اكىمدىك
«مەملەكەتتىك باقىلاۋدى جۇزەگە اسىرۋ ناتيجەسىندە، 2018 -جىلدان قازىرگە دەيىنگى كەزەڭدە جالپى سوماسى 79 ميلليون تەڭگەدەن استام سوماعا 136 قۇرىلىس ۇيىمى اكىمشىلىك جاۋاپكەرشىلىككە تارتىلدى. سونداي- اق پروكۋراتۋرا ورگاندارىمەن بىرلەسىپ قۇرىلىس سالۋشىلاردىڭ ارەكەتىن زاڭسىز دەپ تانۋ جانە قىزمەتىن ۇلەستىك قاتىسۋ تۋرالى زاڭناماعا سايكەس كەلتىرۋ بويىنشا سوت ورگاندارىنا تالاپ- ارىزداردى بەرۋ تەتىكتەرى ازىرلەندى»، - دەدى د. دوسقۇلوۆ استانا قالاسى قوعامدىق كەڭەسىنىڭ وتىرىسىندا.
ونىڭ ايتۋىنشا، ءتيىستى وزگەرىستەر ەنگىزۋ ماقساتىندا اكىمدىك ۋاكىلەتتى مەملەكەتتىك ورگاندارعا ۇلەستىك قاتىسۋ تۋرالى زاڭدى بۇزعانى ءۇشىن جاۋاپكەرشىلىكتى كۇشەيتۋ، سونداي- اق ءبىرقاتار قوسىمشا باقىلاۋ شارالارىن قامتۋعا قاتىستى ۇسىنىستار جولدادى.
«تۇرعىن ءۇي قۇرىلىسىنا ۇلەسكەرلەردەن اقشا تارتۋدى رەتتەيتىن نورمالار قازىرگى جاعدايعا سايكەس كەلمەيدى جانە ءتيىستى دەڭگەيدە جۇزەگە اسىرىلماي جاتىر»، - دەدى باسقارما باسشىسى.
وسى ورايدا ول قۇرىلىس نىساندارىن سالىپ جاتقان كومپانيالار اتالعان زاڭ تالاپتارىن بۇزۋ ارەكەتتەرىنە ءالى دە بارىپ جاتقانىن ايتتى.
بۇدان بۇرىن حابارلانعانداي، ەلوردادا قۇرىلىسى ۇزاققا سوزىلعان تۇرعىن ۇيلەر قاشان تاپسىرىلاتىنى نىقتىلاندى.
2019 -جىلدان قازىرگە دەيىنگى كەزەڭدە 120 تۇرعىن ءۇيدىڭ قۇرىلىسى اياقتالىپ، 14 مىڭنان استام وتباسى باسپانالى بولدى. قالعان 30 ءۇي 2023 -جىلى جانە 2024 -جىلدىڭ باسىندا اياقتالادى دەپ جوسپارلانعان.
