كەدەيلىك شەگى ەندى مەدياندىق تابىس دەڭگەيى ارقىلى انىقتالادى - دۇيسەنوۆا
بۇل تۋرالى بۇگىن ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.
«الەۋمەتتىك كودەكستىڭ ەكىنشى جاڭالىعى - مەملەكەتتىك قولداۋدىڭ جاڭا پاراديگماسى. وعان سايكەس، مەملەكەتتىك قولداۋ، الدىمەن الەۋمەتتىك تاۋەكەلدەردىڭ الدىن الاتىن اتاۋلى شارا، ودان كەيىن عانا اتاۋلى الەۋمەتتىك كومەك رەتىندە قاراستىرىلادى. بۇل رەتتە 2 ماسەلەگە باسا نازار اۋدارعىم كەلەدى. ءبىرىنشى سيفرلىق كارتادان كوپبالالى وتباسىلاردىڭ ءتۇرلى الەۋمەتتىك سىن- قاتەرگە تاپ بولۋ ىقتيمالدىعى جوعارى ەكەندىگىن كوردىك. سوندىقتان، بالالى وتباسىلاردى الەۋمەتتىك قولداۋدىڭ قولدانىستاعى جۇيەسىن ساقتاي وتىرىپ، بالالاردى قورعاۋدىڭ قوسىمشا اتاۋلى ءىس- شارالارى قاراستىرىلىپ جاتىر. وسى باعىتتاعى تاعى ءبىر ماڭىزدى وزگەرىس - اتاۋلى الەۋمەتتىك كومەك بەرۋ ءۇشىن كەدەيلىك شەگى بۇگىنگى كۇنكورىس دەڭگەيى ارقىلى ەمەس، مەدياندىق تابىس دەڭگەيى ارقىلى انىقتالاتىن بولادى»، - دەدى تامارا دۇيسەنوۆا.
ونىڭ اتاپ وتۋىنشە، ەگەر كۇنكورىس دەڭگەيى ادامنىڭ فيزيولوگيالىق قالپىنا كەلۋىن قامتاماسىز ەتەتىن بولسا، مەدياندىق تابىس - حالىقتىڭ ناقتى تۇتىنۋشىلىق شىعىندارىن جاباتىن ورتاشا كۇنكورىس تابىسى سانالادى.
«2025 -جىلدان اتاۋلى الەۋمەتتىك كومەك مەدياندىق نەمەسە حالىقتىڭ ورتاشا تابىسىنان تومەن تابىسى بار ازاماتتارعا بەرىلەدى. ارينە، ونىڭ سوماسى قوماقتى جانە اتاۋلى شارالارمەن بىرگە بەرىلىپ، وتباسىلاردىڭ قيىن ومىرلىك جاعدايدان شىعۋىن قامتاماسىز ەتەدى»، - دەدى مينيستر.
اۆتور
مارلان جيەمباي
